(AP) — Extremista di banda drechi ta celebrando e gesto di brasa stret di Elon Musk durante un discurso dialuna, a pesar cu su intencion no tabata claro.

‘Mi kier simplemente bisa danki pa logra esaki,’ Musk a bisa durante su discurso na Capital One Arena, referiendo na e victoria di Donald Trump den e eleccion presidencial. Despues e la dal su man ariba su pecho, strek su brasa afo y na laira cu su palma puntando abou.

“Mi curason ta bay na boso,“ Musk a bisa, despues di bira pa haci un gesto similar pa e otro banda.

Hopi usuario di red social a nota cu e gesto ta parce un saludo di Nazi. Musk solamente a alimenta mas speculacion pa no explicitamente nenga esaki den un decena di post despues di su discurso. Pero si e la haci bofon di e critica y reacciona contra hende cu a interpreta su gesto asina.

“E atake cu ‘tur hende ta Hitler’ ta un argumento hopi gasta,“ Musk a post na X algun ora despues cu e la baha di e podium.

Critico y fanatico di e CEO di Tesla y e homber mas rico di mundo tabata hopi rapido pa reacciona ariba e gesto.

”E Flama Blanco lo lanta un bes mas” un seccion di e grupo nacionalista blanco nombra White Lives Matter a post na Telegram.

“No bisami cu Elon Musk a haci un saludo di Hitler …“ Evan Kilgore, un comentador di derecha, a post na X. ”Nos ta back mas grandi cu antes.”

E Anti-Defamation League (ADL), un organisacion antisemitismo y pa derecho humano, a yam’e un ‘gesto awkward’ y a pidi pa no saca conclusion mucho pura. Otro monitor di extremismo y expertonan a pone enfasis cu no tabata cla kico Musk tabata trata di manda como un mensahe na e publico di siguidor di Trump cu e gesto di su brasa na laira.

”Mi ta skeptico cu esaki tabata intencional,“ Jared Holt, un analista senior di investigacion di e Instituto pa Dialogo Strategico cu ta sigui odio online, a bisa. ‘Esaki lo ta un acto di self sabotage cu no ta make sense.”

Holt a pone enfasis cu Musk a bisa specificamente cu su curason ta bay na e publico. Esaki por indica un tipo di gesto di gradicimento na nan.

Desde cu Musk a cumpra Twitter, cu awor ta yama X, e ta yama su mes un ‘absolutista di libertad di palabra’ y a ricibi hopi critica pa laga comentario extremista, peligroso y antisemitico prospera ariba e plataforma di red social. Su respuesta tabata pa ataca su criticonan, demanda un grupo sin exito y pa despues demanda un otro.

”Ta parce cu @elonmusk a haci un gesto awkward den un momento di entusiasmo, no un saludo Nazi, pero, nos ta aprecia cu hende a bira nervioso,” ADL a bisa den un declaracion. “Na e momento aki, tur banda mester duna otro un tiki di gracia, posiblemente un beneficio di duda, y hala un rosea grandi.”

Kurt Braddock, un profesor di comunicacion na American University cu ta studia extremismo, radicalisacion y terorismo, a bisa cu e gesto tabata un saludo fascista y cu ‘hende no mester duda loke nan a mira.’

”Mi sa loke mi a mira, mi sa loke e respuesta tabata ta den e gruponan extremista derechista, incluyendo neo-Nazi”, Braddock a bisa. ”Y niun di esaki ta algo pa hari di dj’e.”

Den Europa caminda e saludo fascista ta relaciona cu odio, destruccion y morto den Segundo Guera Mundial, e gesto di Musk a provoca indignacion.

Un organisacion comunista di hubentud na Italia a colga un figurin di Musk boca abou den Piazzale Loreto na Milan, caminda e curpa di Mussolini tabata colga boca abou despues di su ehecucion den e dianan final di Segundo Guera Mundial. E organisacion, Cambiare Rotta (Cambia Curso), a nota den un post na Facebook cu un potret di e figurin a ser kita door di e compania di red social.

”Nos corectamente tin un poco miedo, pasobra e imagen ta espantoso” autor Filippo Ceccarelli a bisa na television priva La7 di Italia.

Conoci como e saludo Romana na Italia, e saludo di brasa stret oficialmente adopta na 1925 pa e regimen fascista di Benito Mussolini, ta prohibi na Italia, aunke raramente ta ser persigui.

E representante di Musk na Italia, Andrea Stroppa, a publica e potret na X cu e palabra:
Imperio Romano ta bek, cuminsando cu e saludo Romana,” segun e agencia di noticia ANSA.

Despues e la kita e post, bisando cu Musk ‘ta autista,’ y cu e tabata expresa su emocion pero a nenga cu e tabata imita fascismo.

”E no ta gusta extremista,“ Stroppa a skirbi.

Na Francia ariba dialuna, mas cu 80 organisacion, incluyendo organisacion di derecho humano, medio ambiente y libertad di prensa a bandona X, aunke no ta sigur si ta Musk of e eleccion di Trump tabata e motibo. Algun universidad y scol tambe a bandona X, hasta corant nacional y local representando diferente banda di e spectrum politico a bandona X.

Brian Levin, fundado di e Centro pa Estudio di Odio y Extremismo na Universidad di Estado di California, San Bernardino, a bisa cu aunke esaki tabata accidental, e gesto cu Musk a haci tin e capacidad pa haci daño na hende.

”Ora bo ta un figura publico den un posicion halto di poder durante un dia di inauguracion, pa haci un saludo asina ta algo hopi perturbante y ta yama pa un splicacion di Musk,“ e la bisa. ”Punto ta wordo buta tocante libertad di palabra. Pero cu libertad di palabra tambe ta bini responsabilidad.’

Levin a bisa cu algun extremista lo tuma e gesto, sin importa su intencion, como ‘un tipo di orden pa marcha’.