EdM discurso gobernador int (1).jpg

Yvonne Laclé, e gobernador interino nobo a duna su discurso dialuna na parlamento unda el a enfoca mas igualdad, respet pa otro, e importante di enseñansa y tambe riba e funcionamento di gobernacion na Aruba.

 

Aki bou por lesa su discurso:

 

 

Reglamento di Gobernador di Aruba ta stipula den articulo 14, inciso 2, cu Gobernador Interino, den un reunion solem di Parlamento, ta entrega un copia di e Decreto Real, pa medio di cua a nombra e Gobernador Interino, segun articulo 13 di Reglamento di Gobernador y e proces-verbaal di e huramentacion.

 

Señora Presidente, cu entregamento di e documentonan rekeri na Parlamento di nos pais, mi a cumpli cu e obligacion aki.

 

Primeramente mi ta desea di expresa mi mas profundo y sincero gradicimento na Su Mahestad nos ReyWillem-Alexander, kende a nombra mi persona como Gobernador Interino di Aruba. Mi lo sirbi Pais Aruba, tanto den mi tarea como Organo di Reino como tambe den mi tarea como Hefe di Estado di Aruba. Ta un honor pa mi di por sirbi mi Aruba stima den e funcion ehemplar aki lo miho cu mi por.

Awe mi kier haci uzo di e oportunidad aki pa dirigi mi mes na Parlamento di Aruba, e organo representativo mas halto di nos isla, y como tal tambe, na henter pueblo di Aruba. Mi ta sigura boso cu lo mi eherce mi funcion segun mi consenshi, na cualkier momento cu haci apelacion riba mi.

 

Como Gobernador Interino lo mi actua segun e norma- y balornan di nos Reino y di nos dushi Aruba, tal como esakinan ta stipula den e tratadonan di cua Aruba ta forma parti, Statuut di Reino Hulandes y nos legislacion y regulacionnan. Mi a sinta pensa cua ta e balor cu ta conta pa nos tur, ta resalta, ora mi pensa riba e “rol” di Gobernador di Aruba.

 

Tratamento igual

Nos Aruba, como un pais chikito, den un totalidad mas grandi.

Un pais cu ta consisti y habita pa no menos cu 93 nacionalidad diferente. Hende di diferente nacionalidad, di religion distinto y di varios descendencia cultural. E diversividad aki den nos sociedad ta duna nos e forsa, e inventividad y e capacidad pa hunto y den progreso, biba riba nos Aruba cu trankilidad, contal cu nos haci esaki hunto.

 

P’esey,  pa mi, articulo 1 di nos Constitucion ta asina importante. Articulo 1, inciso 1 di nos Constitucion ta bisa y mi ta cita: “Ta trata tur hende cu ta na Aruba den forma igual, den casonan igual. Pa e motibo aki no ta permiti discriminacion pa loke ta trata religion, conviccion di bida, inclinacion politico, rasa, sexo, color, idioma, descendencia nacional of social, di ta pertenece na un minoria nacional, di fortuna, nacemento of di cualkier indole.”

Nos Constitucion ta cuminsa cu e articulo aki y esaki ta indica con importante e contenido ta. E principio di igualdad ta un principio fundamental pa un estado di derecho. Esaki ta e guia den un pais, unda tur hende ta conta. Importante ta: Respet pa otro; Respet pa dignidad di otro; Respet pa propiedad di otro y Respet pa institucionnan.

Respet ta contribui na haci nos tur un comunidad, den cua ta reina harmonia, comunicacion y comprendemento. Harmonia ta trece paz, trankilidad, felicidad, exito y progreso. Respet mester existi entre hende, institucionnan y paisnan tambe.

 

Mi meta ta, pata un Gobernador Interino digno, pa tur ciudadano igual, sin distincion di rasa, color of creencia. Esey ta nifica tambe cu, mescos cu mi antecesornan, cu lo mi scucha, stimula, yuda pensa y comparti cu boso y den caso cu ta necesario, actua cu firmeza y cu severidad.

Mi ta desea di wordo informa y di tin un contacto intensivo cu miembronan di Conseho di Minister. Naturalmente tur cos denter di e espacio cu nos constitucion ta permiti na Gobernador como Organo Nacional, y denter e competencia for di e tarea di Gobernador como Organo di Reino.

 

Educacion y gobernacion

E aña aki nos ta celebra 30 aña di nos Status Aparte. 30 aña Pais Aruba. Den 30 aña nos a logra hopi; logra hopi cu cay y lanta. Y ainda nos ta siñando como un pais relativamente hoben. Posiblemente boso sa, cu ami a traha durante mayoria di mi bida den enseñansa, y cu hopi placer. Enseñansa ta mi pasion. Saca lo miho for di un hende, reta y stimula.

 

Como docente mi a reta mi alumnonan y mi a haci pregunta den forma critico. Na mes tempo mi a pidi nan pa reflexion  propio, pa mira bek y pa evalua, pa nan siña cosnan di ayera, pa mañan nan haci cosnan miho. Esaki ta e preguntanan cu mi kier lansa na boso tambe como boso Gobernador Interino nobo.

Si nos tira un bista atras riba 30 aña Status Aparte, ta bon pa cada un cu ta vincula cu gobernacion di Aruba, pa tene un spiel su dilanti.

Con nos Trias Politica ta funciona?

Kico nos a logra hunto?

Unda nos a laga oportunidadnan sin probecha di nan?

Unda nos ta mira posibilidad nan pa mehoracion?

Con nos por pone man na obra awe, cu e experiencianan di pasado, pa logra nos metanan cu nos a pone nos dilanti na aña 1986?

Con nos ta mira nos futuro colectivo?

 

Pa medio di e preguntanan cu mi a formula, mi ta reta boso pa pensa riba esakinan den forma hopi critico.

Boso y ami, ta e “role-model-nan” pa Aruba. Laga nos duna un bon ehempel.

 

Señora Presidente, dia prome di november 2016 mi a huramenta como e di cuatro Gobernador Interino. Mi antecesornan: defunto señor Maximo Croes, señora Christina van den Berg-de Freitas y señora Ella Tromp-Yarzagaray y e tres Gobernadornan a ehecuta nan funcion na un forma excelente. Tin biaha tambe durante circunstancianan trabahoso y delicado. Lo mi haci tur esfuerso pa ehecuta e funcion aki mes bon y mes huicioso cu mi antecesornan.

Mi ta sinti mi afortuna cu na e momento aki mi por a asumi e funcion como Gobernador Interino y por traha e dos luna ainda cu Gobernador Refunjol. Y banda di esey mi ta vislumbra e cooperacion cu e di cuater gobernador di Aruba, señor Boekhoudt.

 

Mi ta spera cu Sr.Boekhoudt y mi persona lo por sirbi nos pais durante e añanan venidero.

Señora Presidente, honorabel miembronan di Parlamento; Manera mi a duna di conoce caba, e Gobernador Interino, como organo di e Pais, pero tambe como Organo di Reino, mester vigila e principionan di Nos Reino y di nos Pais. Lo mi cumpli cabalmente cu esaki. Pa esaki mi ta conta riba boso sosten y cooperacion. Mi ta gradici Dios Todopoderoso pa tur bondad y mi ta pidi su bendicion y guia pa nos tur den Reino.

Masha danki, señora Presidente.