Ayera mainta a tuma luga na Parlamento di Aruba e reunion solemne pa inicia e aña parlamentario number 38 di e periodo 2023-2024 na unda su excelencia Sr. Gobernador Alfonso Boekhoudt a duna su discurso tanto pa parlamentarionan, ministernan y invitadonan presente den e sala.
Cu e presencia di prome minister Evelyn Wever-Croes y otro ministernan cu excepcion di minister Xiomara Maduro y minister Glenbert Croes kende no por tabata presente, su excelencia Gobernador Alfonso Boekhoudt a cuminsa cu un discurso unda derechonan humano, igualdad social y proteccion di esnan mas vulnerabel tabata resalta.
“E 21 miembro cu ta forma parti di e organo aki hunto cu gobierno ta eherce e poder legislativo, un poder cu pueblo a confia na cada un di e miembronan aki presente, esaki ta algo grandi y alabes delicado pasobra e ta implica un gran responsabilidad, e responsabilidad pa defende, proteha y salvaguardia e principionan di nos Estado di Derecho, democracia ta algo valioso, democracia no solamente ta e base riba cual gobernacion y representacion di pueblo ta funda, pero e ta e salbabida di convivencia di respet, libertad, igualdad, husticia y participacion inclusivo, ta crucial pa nos uni lanta y defende e principionan di igualdad y di dignidad humano cual ta un tarea di nos tur, defende y proteha esnan mas vulnerabel como tambe, esnan cu no tin bos, esnan cu bida no a duna nan e oportunidad pa desaroya nan mes, esnan cu a haci di Aruba nan hogar, esnan cu ta yuda nos pais progresa pero toch, ta biba margina, ta tarea di nos tur pa percura pa e bienestar di tur e gruponan aki,” el a sigura.
Igualmente, Sr. Gobernador a continua bisando cu mester tin un ambiente di libertad y respet pa cada ciudadano, den defensa y proteccion di e balornan aki “no tin espacio pa sembramento di odio, intolerancia cu odio of falta di respet pa nos prohimo na tur nivel, haciendo uso pa hopi biaha di anonimato riba rednan social, nos ta prome yama pa duna e bon ehempel.”
Den mesun linea, a destaca e recuperacion financiero y economico despues cu e isla a supera varios fase critico despues di e golpi cu pandemia di Covid-19 a haci, “e panorama economico ta keda uno positivo pa 2024. Esaki ta keda refleha den e presupuesto entrega na Parlamento pa aña 2024 unda cu Gobierno ta premira un resultado financiero miho cu aña anterior. Mientras cu e gastonan di personal lo keda den cuadro di e normanan palabra, e gastonan di interes ta keda punto di preocupacion, aunke cu e proporcion di e debe nacional den comparacion cu nos economia lo reduci segun e resultado presupuesta. Nos ta bibando den un epoca cu hopi reto- y desafionan, pero tambe cu oportunidadnan. E trayecto cu Hulanda tocante refinanciamento di debe di Covid ta andando. Aruba ta boga pa logra un acuerdo a base di respet mutuo cu lo beneficia tur dos partido. Asina Aruba ta sigui traha pa transforma e retonan den oportunidadnan mutuo y ta sigui inverti den e relacionnan importante dentro di Reino Hulandes.”
Conscientisacion ta e prome paso, manera Sr. Gobernador ta sigura, Aruba ta birando consciente cu economia ta basa riba naturalesa, y a bira ora pa balora esaki pa medio di conservacion y proteccion pa asina yuda Aruba prepara pa efectonan di cambio climatico. “accionnan di gobierno t’ey pa percura cu futuro proyectonan no causa daño ireparabel. Den cuadro di esaki lo tin un enfoke pa promove un cultura di reciclahe y preservacion di nos medio ambiente. E continuacion di crecemento economico ta demostra cu como isla chikito nos ta dispone di e capacidad pa hunto supera retonan cu presenta den nos desaroyo economico y nos bida diario. Expansion di actividadnan economico ta un meta riba su mes, pero tambe un instrumento esencial pa desaroyo y bienestar di nos pais y di tur su ciudadanonan,” el a señala.
Sinembargo ainda tin hopi hende na Aruba cu no tin un vivienda pagabel pa construi nan hogar y ta mira nan poder di compra bay atras structuralmente, Ta importante pa subraya, cu desaroyo solamente por realmente yama desaroyo, si esaki ta uno inclusivo den cual niun hende ta keda atras. Inclusion social, economico y politico di un y tur mester wordo promovi.
E resultadonan di e investigacion den enseñansa na Aruba a wordo alinea pa yega na e metanan cu ta calidad basico di enseñansa, enseñansa pa un y tur, y competencianan apto pa e mundo actual y di futuro. Calidad basico di enseñansa ta encera cu tur alumno tin derecho pa participa na un enseñansa di calidad cu ta ofrece oportunidad pa sigui crece.
“Pa realisa inclusion den enseñansa lo sigui cu innovacion den enseñansa profesional pa asina tin miho transicion entre e diferente nivel y lo sigui traha pa un miho acoplacion cu mercado laboral. Lo adapta e maneho pa enseñansa primario, secundario y superior pa asina ofrece miho oportunidad pa e studiantenan y percura cu e transicion di un tipo di enseñansa pa otro ta realisabel. Desaroyo economico no solamente mester ta inclusivo, pero tin un balor agrega ora cu tur hende por mira, midi y sinti e beneficionan di nan esfuerso. P’esey un punto di atencion continuo ta pa duna guia na e hobennan cu a desvia di e bon caminda y cu nan entorno no ta duna nan e oportunidadnan cu nan merece.” Sr. Gobernador a continua di bisa.
Loke un famia promedio mester pa sostene nan mes ta keda aumenta y gobierno tin e tarea ehecuta maneho pa mitiga esaki, ademas a sigura cu gobierno lo sigui aloca fondo cu e meta pa brinda e cuido adecua pa loke ta trata problemanan di salud mental y adiccion. Un area di prioridad ta keda e trato husto y humano pa esnan indocumenta of cu ta den proceso di legalisa nan estadia riba nos isla.
“Aruba, recientemente – y tambe den pasado – a demostra cu pa chikito cu e por ta, no a ria pa retonan cu a presenta den su caminda, ni con pisa y duro cu nan por tabata. Historia ta recorda nos cu den pasado Aruba a experimenta desafionan grandi. Na momentonan mas critico a keda demostra cu Aruba sa con pa nabega tanto den awanan keto como den awanan turbulento. E ta manera e palo di watapana cu su raiznan ta profundo cu aunke e ta haya sota di biento duro, e no ta kibra, pero ta bira mas fuerte y resistente. Pues aunke cu tin desafionan grandi cu nos tin cu enfrenta, sin embargo trahando hunto y cu e meta central di hiba nos pais dilanti, nos por crea un futuro mas miho y sostenibel. Awo ta e momento pa hunto nos pensa como Pais pa Aruba progresa y cada ciudadano contribui na un desaroyo saludabel di nos Pais.”
Esaki ta e parti di e discurso cu su excelencia Sr. Gobernador a bisa ayera den parlamento y despues a finalisa cu “Dios ilumina y guia nos pasonan y decisionnan riba e caminda pa bienestar y progreso di nos Pais y pa nos no ta indiferente na ora di proteha y defende loke democracia ta nifica.”
Algun di e potretnan ta cortesia di Gabinete di Gobernador.
