Habitantenan di Boneiro, Sint Eustatius y Saba na 2020 ta haya mas cen pa gasta, miho infrastructura y un gobierno mas fuerte. Pa e islanan ABC lo bini ‘ayudo practico’ pa motibo di e crisis na e pais bisiña Venezuela.
Segun Retkaribense, Esaki ta e plannan di gobierno Hulandes cu Rey Willem Alexander a divulga den su discurso na ocasion di dia di apertura di aña parlamentario.
Hopi pobresa
Caminda viviendanan na Hulanda Europeo a tende caba cu otro aña nan lo haya un promedio di 2.1 porshento mas pa gasta, pa e habitantenan di e munisipionan Caribense esaki ainda no ta conoci. E munisipionan extraordinario – y specialmente Boneiro – tin hopi aña caba ta lucha cu pobresa, algo cu cuminsamento di e luna aki a sali tambe den e rapport di investigacion di defensor di pueblo nacional, den cua tin para cu ‘40 porshento di ancianonan ta biba den pobresa y regularmente no tin di come’.
Mal caminda y mal transport
Gobierno Hulandes ademas ta priminti – mescos cu aña pasa – ‘un mehoracion di infrastructura’ na Hulanda Caribense. E mal estado di e camindanan, e transporte aereo caro entre e islanan – e unico manera pa biaha entre e islanan – y e falta di transport publico ta un tehi pa e habitantenan. Na Sint Eustatius tin ‘erosion di tera’ y e habitantenan ta mira partinan grandi di nan isla ta disparce den lama.
No ta bini eleccion nobo
Hulanda na 2020 ke traha na ‘miho gobierno na e islanan’. Actualmente henter e enfoke ta riba Sint Eustatius. Na 2018 Hulanda a manda e gobierno ey cas, pa motibo di ‘descuido grave di nan gobierno’.
Despues cu Hulanda a tuma gobierno di Statia over nan a priminti di ‘trata e problemanan di mas grandi na 2019, un ‘intervencion ‘gubernamental mas cortico posibel, pero mes largo cu tin nodi’, segun ministerio. Pero den un aña y mei e mandatarionan Hulandes ainda no a logra di drecha maneho financiero na e isla. No ta cla ki dia si.
Gobierno Hulandes ta spera si cu tanto e reorganisacion di e munisipio extraordinario y tur prevision nobo di ICT lo ta cla otro aña. Na Den Haag ta spera claridad denter di algun siman tocante eleccionnan nobo.
Crisis Venezolano
E crisis Venezolano y su consecuencianan pa Aruba, Boneiro y Corsou tambe a palabra den e discurso.
“E crisis politico y humanitario na Venezuela tambe ta confronta e parti Caribense di Reino cu e menasa di migracion na gran escala y e consecuencianan economico di esaki’, Rey a bisa.
Gabinete Hulandes lo uza casi 24 miyon euro e aña aki pa sostene islanan ABC. E cen aki ta specialmente pa trata y deporta Venezolano mas rapido posibel. Tambe lo tin cen ta bay pa busca refugiado di barco riba lama. Specialmente e ministerionan di Defensa y Husticia y Siguridad lo ehecuta esaki.
