Den cuadro cu codigo di conducta di deporte cu Telefon pa Hubentud a introduci aña pasa, nos a acerca Cuts and Curves pa wak con a sigui despues di un aña di e proyecto aki. Nos a dialoga riba kico esaki kiermen pa clubnan deportista, pero te hasta tambe den ambiente di gym.
Aña pasa riba celebracion di 17 aña di existencia di Telefon pa Hubentud, nan a lansa un proyecto nobo riba dia internacional di derecho di mucha. E proyecto aki tabata e Sportsgedragscode, cual ta un codigo di conducta pa deporte pa asina tur e actornan cu tin di haber cu deporte por practica esaki mas sigur y mas saludabel cu ta posibel. Aña pasa nan a invita diferente team deportivo pa un actividad cu muchanan, unda cu e team di Cuts & Curves a participa.
Instructor profesional Rashyd Curiel di Cuts and Curves Aruba ta bisa Bon Dia cu pa su persona e tabata un placer participa den e proyecto aki. Tabata tin tres instructor cu a duna algun training na e muchanan durante e evento aki na Linear Park. Despues di un aña di su introduccion, nos a sigui e combersacion cu Cuts and Curves e biaha aki pa dialoga riba e diferente puntonan cu ta conta pa clubnan deportivo y te hasta den un ambiente manera un gym.
Discriminacion
E codigo di conducta pa deporte ta basicamente guiansa pa tur deportistanan; principalmente pa no tin discriminacion. Manera cu nos a menciona den un publicacion anterior riba e tema aki, e proyecto aki a bay mas leu tambe y keda introduci na clubnan deportivo y gymnan. Sr. Curiel ta splica cu ta importante pa mantene na e puntonan/reglanan aki ta cu tin biaha un coach mes por ehempel ta discrimina sin cu e sa. Por ehempel dunando bentaha na e deportistanan color scur pasobra nan ta hunga miho den nan opinion. Y lagando otronan cu no ta di un tal color di cuero of nacionalidad sinta den bench mayoria di biaha.
“E por ta tambe edad, of tipo di curpa, of cu bo ta mucho chikito pues mi no kier bo den tal posicion. Futbol na un edad jong ta algo leuk y mester keda leuk tambe pa nan. Mas grandi cu bo ta bira tin mas reglanan cu ta bini acerca cu bo tin cu compronde. Pero e parti di discriminacion semper tey, den deporte e ta algo hopi grandi,” sr. Curiel ta splica. E deportista tin apenas dos aña cu e ta awo bibando na Aruba y trahando como instructor profesional, pues e discriminacion na Aruba e no por bisa ainda si ta grandi.
Generalmente di loke bo ta mira rond mundo bo por constata cu esaki semper ta keda bini dilanti segun e ta splica.” Na Aruba, tin biaha mi sa scucha storianan cu nos ta yama politica, den sentido cu un trainer por conoce e mayor of mama, of ta amigonan di hopi tempo. Anto e ta pasa cu djis pasobra ta famia of amigo di famia, ta duna tal mucha mas beneficio. Mi a yega di experiencia esey,” sr. Curiel ta bisa.”
Manera cu nos a menciona anteriormente, e codigo di conducta ta encera puntonan/reglanan cu ta cosnan hopi natural y conoci caba: yega na ora pa bo training, mayornan no permiti pa bebe alcohol den of cerca di veld etc. E ta puntonan di comportacion cu tambe ta refleha bek den e fanaticonan y trainernan pa asina e hoben practica su deporte hasta mas bon den nos comunidad.
‘Harrasment’ den gym
Cuts and Curves a cuminsa manera un body building gym inicialmente. Aworaki poco poco nan ta ofreciendo mas tambe den e ramo di lifestyle fitness rond Aruba. Sr. Curiel ta splica nos cu un di e cosnan cu nan ta hopi stricto cu ne ta e parti di hende homber of muhe cu ta molestia otro den gym. “Na prome instante por a mira cu esunnan practicando body building tabata spanta e otronan cu djis kier a bin train.
Y bo ta haya cu ora un dama bin train, aki aya lo tabata tin hende ta molestia nan mirando nan ta train, haciendo e persona poco inconfortabel. Esey ta algo cu mi ta trata directo, si mester hala un persona un banda un rato y sinceramente splica pakico no por haci esey pa nos ta riba mesun liña,” sr. Curiel ta splica.
El a duna nos un ehempel cu un biaha un dama tabata train na e gym, anto un homber desconoci a bin su tras y ofrece pa yud’e. Pero e homber a wanta e dama den un manera no mucho apropia na su pecho. Curiel: “Ami tabata para eynan y tuma nota cu esey no a mustra mucho apropia. Siguiente dia mi a puntra e dama con el a experiencia esey.
E dama a bisa cu pe e tabata un yudansa pero e no conoce e persona pues e tabata un situacion poco straño pe. Mi a papia cu e homber tambe kende a wak e mas manera un ayudo cu el a haci y no por a compronde con e dama a sinti. Pero el a pidi disculpa.”Esaki ta algo cu semper lo sosode den un gym,” segun e instructor ta conta nos.
