Antayera minister di finansa, Xiomara Ruiz-Maduro (MEP) a referi riba e prijs di pan of kipashi. El a referi na e tema aki, ya cu subimento di impuesto ta trece un aumento tambe riba productonan y servicionan den nos pais, y kipashi ta un producto di prome necesidad.
Actualmente plan blanco cu ta bay bou pakete basico e prijs ta subi entrante diadomingo awor. E kipashi pan blanco ta bira 3.45, e ta subi cu 17cen. El a bisa cu prome cu gobierno a bin cu e crisisheffing nan a ricibi bishita di asociacion di panadero cu a bin cu cierto deseo dilanti. Nan kier mira e pan blanco plus y pan bruin inclui tambe den e pakete basico of bou di control di prijs.
Minister Ruiz-Maduro a tuma nota cu e asociacion di panadero a publica un articulo unda nan ta indica cu kipashi cu e subida di prijs a bira 4 florin cu 8cen. Mientras cu gobierno ta mustra cu pan blanco cu e subida aden ta bira 3.45 fls. E mandatario ta aclaria cu e diferencia di prijs tin di haber cu e pan plus no ta cay riba canasta basico. Kiermen e producto aki no ta regula sino cu e ta exponi na e mercado liber cu nos ta conoce na Aruba.
El a splica cu tin dos panaderia miembro di nan asociacion cu ta traha pan plus. E ta un pan cu ta wordo produci for di 2010, ora cu gobierno anterior a bin cu revision encuanto e prijs di pan. E panadero no a acepta esey, y nan a bin cu e plan plus cu no ta cay bou e canasta basico of control di prijs.
