Gobierno mes ta regula e prijs di 16 producto cual ta wordo yama e macutu basico. Segun minister di Asuntonan Economico Richard Arends ta conta Bon Dia Aruba, gobierno ta explorando maneranan pa introduci un otro concepto di macutu basico cual tambe lo ta mas saludabel.
Control
Prijsnan di macutu basico ta riba comestibel di prome necesidad. Esey ta loke ta wordo controla hunto cu prijs di gasolin. Gobierno mes no ta importa ningun producto, pues ta den man di e consumidor y importador cu ta fiha e prijs segun minister Arends. “Obviamente nos ta na altura si cu tin discrepancianan hopi grandi no solamente den prijs pero den e calidad di e producto. Esey tin mi atencion como minister di Asuntonan Economico pero tambe minister di Husticia y Salubridad Publico pa controla e calidad di productonan cu tin den e supermercadonan.”
Segn minister Arends, durante añanan nan ta haci “spot checks” na otro luganan cu supermercado, manera restaurant y luganan cu ta trata cu cuminda ta wordo controla. “Departamento di Asuntonan Economico no ta controla solamente e prijs, pero tambe e meta cu e establecimentonan aki tin. Cu nan ta cumpli cu e vestigingsvergunning cu a wordo otorga y bende loke nan tin permiso pa bende.”
Diferencia di prijs excesivo
Pues fuera di loke tin den e macutu basico, segun e mandatario ta splica nos, no ta tarea di gobierno pa controla prijsnan. Pero si ora cu tin prijsnan diferente na un escala “excesivo” den comercio segun minister Arends subraya.”Pues algo cu por ta 1 florin na un tienda y 20 florin na e otro, eynan Dienst Huur en Consumenten Bescherming por tin un rol.” Pa loke ta supermercado, ta 185 supermercado tin anto segun e mandatario, su departamento ta regularmente controla nan prijsnan via e macutu basico. “Yega duna un multa ta un medida poco extremo. Si ta duna e comerciante e oportunidad pa cambia cualkier cos cu e controladonan di prijs ta haya mester wordo cambia.”
Mercado liber
E mandatario ta splica Bon Dia Aruba cu partimento di multa a yega di sosode den pasado pero mayoria di biaha e comerciante mes ta ahusta e prijs anto no ta yega oficialmente como un accion cu mester tuma luga. “Mi no ta kere cu gobierno mester interveni mucho den loke ta trata mercado liber. Nos ta biba den un sociedad liber, un mercado liber unda tur hende su derecho ta protegi. Di e consumidor como tambe di e comerciante. Nos no ta biba den un ‘police state’ unda cu un gobierno mester controla tur cos. Mi ta kere nos ta podera e consumidornan hopi. Rednan social mes ta yuda nos hopi pa por controla kico ta pasando.”
E mandatario ta conclui cu loke si gobierno mester garantisa ta un ‘level playing field’ cu tur hende cumpli cu e rekisitonan stipula pa por haci un negoshi . Recientemente cu e moratorio, e mandatario ta indica cu esaki di berdad ta e ultimo remedi cu gobierno ta uza pa interferi den mercado liber. “E ta algo cu no ta facil y bo mester tin grounds hopi fuerte pa nan pa por ehecuta algo asina. Pasobra bo ta frena actividad economico.”
Den pasado ministernan di asuntonan economico manera Nilo Swaen (MEP) y Michelle Hooyboer-Winklaar (AVP) a priminti pa bin cu leynan di Mededinging y tambe miho proteccion di consumidornan. Pa asina garantisa e ‘level playing field’ y por ehempel por tin instrumentonan pa combati ‘prijsafspraak’ entre companianan cu ta perhudica competidonan y consumidornan. Sinembargo añanan a pasa y e leynan, aunke nan a traha riba nan y hasta yega asina leu cu conceptonan di ley, te ainda no a pasa den parlamento.
