Wever-Croes Norm ta un ley cu huridicamente ta yama Landsverordening normering topinkomens (LMT), un ley cu ta bin pa un maximo di salario di directornan di sector semi-publico, companianan estatal di gobierno cu no ta departamentonan gubernamental.

Asina a splica prome minister Evelyn Wever-Croes ayera durante un conferencia di prensa, unda el a sigura cu e ley aki a bira mas actual pa motibo cu Gobierno di Hulanda a pone esaki como un condicion pa nan por paga e empleadonan publico back e 5% cu nan kier paga entrante luna di juli di e aña aki.

Segun el a expresa, nan a realisa cu na Aruba tabatin cierto compania estatal cu tabatin nan directornan ganando salarionan hopi halto. Pueblo a indica cu esey no ta husto, cu prijsnan di utilidadnan ta subi, siendo cu salarionan di directornan ta hopi halto. Y ta p’esey cu a bin cu un ley, caminda prome minister a bisa cu ya caba tabata existi un ley asina na Sint Maarten y Hulanda, manera el a compronde.

Wever-Croes a comenta cu mester stipula un maximo di loke ta wordo yama e ‘top funcionaris’, cu ta trata di directornan of esnan cu a haya e management di un compania, cu ta bin cu un cifra maximo pa ontslagvergoeding ora ta trata di un director cu ta wordo retira y tin cu pag’e un suma te un maximo di 12 luna cu hasta 78.000 florin.

Di esaki, prome minister a conta cu el a haya den su ministerio directornan cu tabatin ontslagvergoeding cu a bira hasta 3 miyon florin. “Esey ta abuso y cu e ley aki e abuso ey ta pasa pa pasado”.

Awor e maximo di e salario, nan punto di salida ta e salario di un minister y riba dje nan ta indica cu e persona por gana mas cu un minister te na un 30% mas, loke ta nifica cu ta 130% di e salario di un minister of minister presidente. Ora nan a calcula esaki nan a yega na un cifra aproximadamente di 261.000 florin pa aña.

Aparte, prome minister a bisa cu nan a hinca algun elemento den dje debi cu nan a haci un nulmeeting y di e diesdos compania of instituto semi-publico cu a participa den e nulmeeting aki, den e lista aki nan no a publica e nomber di e 12 persona, pero si nan a pone loke ta nan salarionan bruto pa aña cu ta varia, pa motibo cu tin diferente instancia.

Ademas, el a declara cu ora nan a dicidi di implementa e norma aki, un entidad so ta cay bao di dje, unda cu ta cuminsa cu 249.375 florin pa aña hasta 694.984 florin pa aña cu ta di un director. Kiermen di 40.000 pa 50.000 florin pa luna, 4 of 5 biaha mas halto cu un minister. “Esakinan loke pueblo a indica, cu nos mester bin cu un orden den e desorden aki”, el a bisa.

Ora nan a presenta e norma di 261.000 florin, manera el a indica caba, un di nan so a surpas’e na unda nan a investiga di manera mas profundo y a bin e ora cu un proposicion di pone e krans na 410.000 florin, cu algun di nan so a sali di dje. Sinembargo, “Hulanda a bisa no y mi ta pone cu mester ta 261.000 florin”, esaki a ser poni como un di e condicionnan pa Aruba por haya sosten di likides y tempo aya, unda cu Aruba tabata den pleno pandemia di Covid-19.

Ademas, el a señala cu si e companianan y institutonan aki ta paga menos salario, haci nan mas normal pa Aruba, nan tin mas ganashi y gobierno ta haya mas dividendo, cu e placa aki no tin mester di presta placa di Hulanda of di otro instancianan pa cubri e gastonan, esey ta e ciclo cu tin segun minister presidente a expresa.

A pesar cu e Wever-Croes Norm no ta den ley ainda, pa motibo cu na e momentonan aki ta den parlamento, e companianan estatal bao di ministerionan anterior di prome minister ta cumpli cu esaki, el a sigura cu ta WEB, Elmar y Utilities.