Directornan di companianan mester adapta nan salario; Wever-Croes Norm lo bira un ley

Wever-Croes Norm ta e norma cu ta stipula un maximo cu ta conta pa salario di directornan di compania estatal. E patronchi pa determina esaki ta e mesun salario di e prome mandatario.

Prome Minister, Evelyn Wever-Croes a bisa cu segun e norma aki e salario aki ta wordo maximalisa na 130% di e salario di Minister President. Aunke e norma aki a keda formalisa, ya nan ta bin aplicando esaki caba. El a bisa cu gobierno a aplica e norma aki den e vacatura cu tabatin pa director di Elmar y Utilites.

Despues di un luna cu nan no a reuni den conseho di minister, diabierna ultimo nan a aproba e punto di salida di e Wever-Croes Norm aki cu ta bay conta pa e siguiente tempo nos dilanti. Ademas esaki ta un di e condicionnan cu Hulanda a pone tambe.

El a bisa cu e decision cu conseho di minister a bay di acuerdo cune tin di haci cu niun director di compania estatal ni Sui Generis (SG), tampoco fundacion subsidia pa gobierno, por gana un salario di mas cu 130% di e salario di Minister President. Tambe lo maximalisa kico lo ta e areglo di daño y perhuicio cu ta wordo paga, ora cu un director ta wordo retira.

El a bisa cu aworaki nan ta bay den combersacion cu e directornan cu ta surpasa e cifra porcentual aki. Segun e mandatario, no ta tur e directornan ta surpasa actualmente e limite cu e norma ta stipula, pero algun di nan talbes. E mandatario a bisa cu e no tin un bista di tur e salarionan cu e directornan aki ta gana.

E intencion di e combersacion aki ta pa mira si boluntariamente nan ta bay di acuerdo pa baha nan salario, si e ta surpasa e Wever-Croes Norm. E reduccion aki lo wordo haci den un periodo di maximo dos aña. Esaki tambe ta e periodo cu Hulanda a duna den nan ultimo condicion.

Te ainda e ta keda un norma. P’esey el a laga sa cu pa evita mas abuso den futuro nan a dicidi hancra e norma aki den ley. Gobierno ta bay cuminsa traha riba e ley aki door di nan departamento di legislacion. Mientras tanto nan a institui un comision di Corporate Govermance Code cu ta haciendo e trabao preliminario. E no ta descarta cu pronto e ley aki lo ta den parlamento.

Sinembargo e ta haya cu e discusion riba salario di directornan di compania estatal a bin, no solamente debi na Hulanda su exigencia, sino cu nos mes como pais – segun e mandatario – a bin cune. El a cuminsa ora cu nan por constata cu tabatin salarionan di algun di e directornan di compania estatal cu e ta haya ‘suma exorbitantemente halto’.

Pa trece un ehempel el a referi na e caso di ex-minister y actual Parlamentario, Richard Arends kende tabatin un contract cu Refineria di Aruba (RdA). Caminda tempo cu e tabata consehero di e gobierno anterior, el a wordo nombra como un di e directornan di RdA cu un salario cu e mandatario a cualifica di ‘astronomico’. Finalmente e parlamentario a dicidi di hala e contract aki aden.

A pesar di algun caso, te ainda e problema aki no tin e mesun magnitud cu na Corsou. Sinembargo e ta señala cu tin algun ‘excepcion cu a wordo causa pa e gobierno anterior’.