Si e dia di mañan ta bin cualkier tipo di investigacion pa check e maneho financiero di Oficina di Turismo di Aruba (ATA), nan ta trankil ya cu tur nan cuentanan ta cla, transparente y cu no tin nada di sconde. “E ta mas cu claro”, directora di ATA, Ronella Tjin Asjoe-Croes a declara na Bon Dia Aruba.

E kier duna reaccion  ya cu hopi biaha e por a tende “reaccionnan y opinionnan cu ta eroneo”.  E ta lamenta esaki, ya cu for di aña 2011 ATA ta bin trahando su rapport anual, y na 2012 a produci e prome di nan.

Siman pasa e oficina a entrega su cuenta anual di 2016 na gobierno y despues e lo wordo entrega na parlamento. Esaki ta e di 6 rapport anual cu nan ta entrega for di cu ATA a bira un instancia independiente. Den pasado cuestionamento pisa a bay den direccion di ATA riba e forma di maneha nan fondonan. Sinembargo e instancia aki pa medio di su directora a haci enfasis cu nan tin un control stricto tanto interno como externo.

Te hasta aña pasa ATA tabatin bishita di Centrale Accountants Dienst. Di parti di gobierno tambe a bin e deseo di haci un revision di ATA.  Esaki a sosode den e prome kwartaal di aña pasa. “Mas cu claro, ATA semper  ta dispuesto pa duna cooperacion na e cosnan aki.”

Control y maneho
Ademas sra. Tjin Asjoe-Croes a laga sa cu defacto den ATA nan a hinca mas control y nan ta zorg pa tin un audit interno mensualmente for di 2014. E trabou aki ta wordo haci pa un firma independiente cu ta prepara e caminda pa e audit general tambe. E ta un forma pa yuda  ATA pa asina traha conforme cu nan plan di risico y maneho.

“Con esaki nan ta wordo ehecuta den procedura y advertencia di tur hende na e proceduranan aki.” Tur luna nan ta haya un rapport y nan ta raporta esaki na e hunta di supervision.  E ta añadi cu por lo general e resultadonan ta hopi positivo.

Directora di ATA a manifesta cu ta di suma importancia pa tur hende sa cu tin un maneho transparente, profesional y na ordo conforme e ley. “Si e no ta bay asina ey, esey kiermen cu bo ta actua contra e ley.”

E ley di ATA ta basta amplio y ta stipula diferente puntonan cu nan tin cu cumpli cu ne.  Tambe nan mester zorg pa nan planificacion y presupuesto por cana mas tanto cu ta posibel conforme na locual nan ta proyecta. Ora  tin espacio pa ahustacion nan por hacie, pero e ta haya importante pa nan splica esaki tambe pa medio di nan rapport anual

E directora ta indica cu un rapport anual ta duna bo un bista di nan maneho.  Kiermen kico ATA a haci conforme na locual a wordo acorda den presupuesto; y kico no a bay conforme na loke a wordo planifica.  E ta un di e dos momento cu nan ta considera relevante durante henter un aña den cuadro di e ley cu ta regarda ATA. Pues no solamente entrega di presupuesto unda ta  para kico ATA ta bay haci; pero tambe e entrega di nan rapport anual unda ta para kico nan a haci cu e maneho di nan presupuesto. E no ta solamente basa riba nan actividad den general; pero tambe hunta di supervision tambe mester duna su rapport di kico e hunta mes a haci.

Tambe e ta haya cu e auditoria financiero di ATA pa un instancia externo ta sumamente cardinal. “Esey claro bo no ta hacie abo mes. Un otro partido independiente di renombre den e caso aki e compania Ernst and Young ta haci un auditoria completo den ATA cada aña.” Un punto cu Tjin Asjoe-Croes ta considera importante ta cu e rapport anual ta carga un stapel of aprobacion di e maneho financiero cu ta parti integral di e rapport aki. “No ta nos ta bisa. Mi ta kere cu ta practica internacional cu ta confirma cierto manehonan.”