Entrante dia 1 di juni awo, e proceso pa facilita e cliente di Dimas y haci cu e tempo pa sinta warda, pa un servicio, a mehora. Pa medio di cita, ta duna asina e cliente di Dimas trankilidad cu e por bin riba e dia y e ora cu el a haci e cita y e tin e ora e
siguransa cu Dimas lo brinda un bon servicio y si e cliente tin tur cos na ordo, por acepta e aplicacion tambe.
Esaki ta un manera pa por maneha e fluho di hende cu ta halto y ta bin Dimas a base diario y evita cu personanan ta bin para den rij di mainta tempran pa nan por haya servicio mientras cu Dimas ta brindando servicio henter dia.
Turistanan
E asunto di personanan stranhero cu ta bin keda pa un tempo cortico, como turista, tin su exigencianan. Kathy Paskel, directora di Dimas a splica cu tin exigencianan pa esaki, cual ta controla ta paspoort, ta controla ticket, seguro, den caso cu nan ta keda na cas di famia, tin
un hende cu tin cu para borg pa nan y asina tin ta controla tambe si e persona por sostene su mes na Aruba, pa e persona cu ta para garantia por carga e gastonan cu ta relata su estadia y den casonan cu ta rekeri ta haci control di cas tambe. Tin proposicionnan pa ahustacion di e maneho aki cu ainda ta rekeri di
decisionnan politico y esey ta wardando riba dje.
Tres tipo di permiso
Paskel a sigui splica cu tin un variacion. Dimas ta atende tres tipo di permiso. Ta atende e prome permisonan, pero tambe tin prolongacion y cambio. Si wak te cu Maart, tin 688 prome peticion, 1672 prolongacion y 603 cambio, pues personanan cu ta cambia di un of otro estadia of cambia di dunado di trabao.
Si coy te na Maart, por wak di e 688 por parti’e den prome peticionnan, di cual cu 127 ta pa trabao. 123 pa empleado domestico y e otronan ta pa sobra di labor. E ora asina ta reparti nan cu trabao, of sin trabao, e ora ta haya un cantidad y cua ta e peticionnan cu tin den tramite. Ta traha segun unidad. Cada unidad tin un portfolio pa atende di e personanan cu a haci peticion. E parti cu tin di haber cu famia, reeducacion of si ta na Aruba caba, tin otro unidad cu ta atende cu labor y permisonan indefini y tin un otro unidad cu ta atende e otro categorianan di permiso. Tin permiso pa studiante, stagiaire, etc.
No tin carchi ros mas
Tin diferente evaluacion tumando luga, con por haci esaki. Un otro cambio cu Dimas ta poniendo ta cu e cliente cu na final di e trayecto tin un decision pe. E cliente ey antes tabata haya un carchi ros na cas unda cu e por bay busca su permiso of su contesta mas bien na postkantoor. Desde cu Dimas a muda, a finalisa esey y e cliente ta wordo yama y por pasa busca su contesta na Dimas mes. Eynan tambe ta bay introduci un mehoracion pasobra ta comunicando actualmente via enumbernan cu ta wordo poni riba e aplicacion y no tur ora ta logra
localisa nan. Ta bay comunica cu e cliente na momento cu e proceso ta cla cu e ta haya un e-mail y e ta haya e ora notificacion cu su permiso of su contesta riba e aplicacion pa permiso ta cla. Esey por nifica cu e por ta un permiso, pero ta nifica tambe cu e por haya un negacion, pero den ambos caso, den un tempo rasonabel, ta boga pa e persona haya un contesta riba su peticion. Banda di esey tin tambe evaluando con pa miho atende cu casonan mas dificil. Tin casonan cu ta
fit den e cierto hokinan cu ta stipula den beleid, pero otronan cu por ta no ta fit den e hoki aki of e hoki aya. E casonan ey ta bay duna atencion tambe y esey ta loke ta evaluando con pa miho atende cu eseynan y tin tambe pa cierto productonan cu e cliente no mester ni bin pa entrega nan na balie, pero lo bay tin un drop off box y esey ta conta por ehempel pa esnan cu ta bin pidi restitucion di nan “leges of waarborgsom”. Esey por wordo aplica door di pone nan solicitud den un buzon y esnan cu ta pidi carta di re entrada tambe no ta necesariamente lo mester haci un cita pa bin aplica pe pero por pone e peticion den e buzon y Dimas lo atende cu esaki. Asina ta purba di maneha tur locual cu tin na peticionnan y e ora tambe atende cu e parti di servicio na publico, Paskel a splica.
