Directora di biblioteca: “Laga nos bisa awe fiesta di buki ta cuminsa”

Diabierna Biblioteca Nacional Aruba (BNA) a celebra e apertura di nan 24 version di Festival di Buki pa Mucha 2016. E ta henter un siman cu biblioteca hunto cu un grupo di autor ta dedica specialmente pa promove y stipula e bon custumber di lesamento cerca nos muchanan di scol.

Den combersacion cu Bon Dia Aruba, directora di BNA, Astrid Britten ta expresa su satisfaccion hopi grandi cu e acontecimento aki. “Laga nos bisa awe fiesta di buki ta cuminsa.”

Participacion

Ta asina cu for di awe te cu diabierna 4 di november 18 autor ta bay bishita na tur scolnan pa conta riba nan bukinan y material sea como ilustrado, autor of contado di cuenta. “Asina ta cu tur hende ta bay haya algo”, segun Sra. Britten.

Tur autor ta na Aruba caba y mayoria di nan a yega diahuebs atardi y otro a yega diabierna mainta. Esun cu a yega te diasabra tabata Roland Escolastica kende tabata na Colombia ricibiendo un reconocimento pa su trabou den cuadro di Feria di e Buki cu e aña aki a wordo dedica na Reino Hulandes.

El a recorda cu e aña aki nan ta celebrando e di 24 edicion di e Festival di Buki pa Mucha bou e tema: Opa y Oma Conta mi y Inspira mi”. Aña pa aña e festival aki a bin hayando un gran acogida y te hasta a bira chikito pa realisa e actividad aki paden pa motibo di e cantidad di bishitantenan no solamente muchanan sino adultonan. Tabatin e participacion di e book store nan mas importante den e mercado di buki, caminda nan ofrece bukinan infantil na prijs special.

Opa y oma

Sra. Britten a bisa cu como biblioteca nan ta contento pasobra e tema tambe ta inspira pa tin tur sordo di hende di tur edad. Pa loke ta e parti di contenido Scol Prinses Amalia ta encarga pa trece esaki pa dilanti cu un bunita show patras di biblioteca mes, unda cada bes nan a trece e imagen di opa y oma padilanti. Biblioteca ta contento cu e tema di e aña aki a wordo presenta debidamente y cu tambe el a wordo bon acepta.

“Hopi biaha nan ta esun cu ta wak pa e muchanan di awendia tambe ya cu e rol a cambia un poco.” Sra. Britten a agrega cu tanto opa como oma ta hunga un rol hopi importante den bida di e muchanan.

Tambe directora di biblioteca a destaca e presencia y envolvimento di diferente scol, ya cu e programa aki tabatin un efecto di bal di sneeuw. Diferente scol a participa y e muchanan a bin bisti al estilo opa y oma. E cifra –segun Sra. Britten- ta papia pa su mes pasobra nan tin un participacion di alrededor di 60 scol e aña aki. Nan ta scolnan basico, preparatorio y special.

Te hasta e grandinan di Kibrahacha a haci un programa rond di e tema aki pa stimula lesamento entre nan mes. “Lesamento ta pa tur hende, no tin edad.”

Na final el a declara cu cada aña cu nan ta realisa e festival aki nan ta confronta desafionan nobo specialmente otro aña cu biblioteca lo celebra 25 aña di Festival di Buki pa Mucha. Ta asina cu manera nan ta clausura e festival aki diabierna awor, BNA lo cuminsa pa traha cu e aniversario di “plata” di e festival aki. E clausura di e Festival di Buki pa Mucha 2016 lo tuma luga patras di biblioteca nacional na Playa, diabierna awor.