Directora di ATA, Ronella Tjin Asjoe-Croes: Tin espacio pa expansion pero e mester ta un expansion sabi

E posicion di ATA tocante e construccion di mas hotel ta cu ainda tin espacio pa crecemento. Pero –segun directora di ATA, Ronella Tjin Asjoe-Croes – e dificultad cu ta cu nan no sa actualmente cual ta tur e proyectonan cu ta den tapara.

El a bisa cu nan no tin un bista den esey. ATA a puntra gobierno den varios ocasion, no solamente e gobierno actual sino gobierno anterior, pa haya un bista hopi cla kico nos tin awor caba cu no ta completamente cla, e tin cu bisa. Pero tambe kico ta para pa e añanan siguiente.

E di dos punto cu directora di ATA ta trece dilanti pa argumenta cu tin espacio pa expansion, e mester ta un “expansion sabi.”

Ora cu Tjin Asjoe-Croes ta referi na un ‘expansion sabi’, e kiermen un expansion cu por duna bo proporcionalmente mas beneficio cu e costo cu tin cu cada construccion of entrada di un hotel of acomodacion. Den un caso asina irevocablemente bo tin un costo social, presion riba trafico, educacion, etc… Te hasta aspecto cu tin cu importa trahado pa bin traha.

“Tur esaki ta costo nan di un desaroyo asina aki. Pero di otro banda bo tin beneficionan,” el a bisa.

E ta haya cu si e beneficionan pa ehempel di un St. Regis cu ta un hotel di luho y di cinco strea cu ta cuadra cu e vision di atrae e turismo di calidad, nos tin cu wak di balansa kico e ta costa nos. Pero tambe nos mester mira tur e otro cosnan cu un proyecto asina lo nifica pa e expansion lo ta den e mesun linea. “Sino e ora e no ta traha di un manera productivo pa Aruba, y por ta contra productivo,” segun directora di ATA.

ATA tambe a haya importante cu gobierno a instala un plataforma awor unda tin diferente comisionnan cu ta bay sigui amplia y traha ariba otro facetanan di studio di capacidad di carga. Esaki uzando loke ATA a yega di haci caba riba e tereno aki.

E ta compronde cu a base di e estudio cu lo wordo haci, gobierno lo fiha maneho entre otro riba e parti di acomodacion, direccion specifico y otro area.

El a expresa cu ATA ta contento di por forma parti di e plataforma di evalua nos capacidad di carga pa medio di diferente reunion y decisionnan.