E posicion di Director General y Director Financiero di WEB ta insigur. Director di Utilities Aruba NV ing. Richard Eman a confirma cu tin diferencianan cu ambos ehecutivo di WEB, y cu tin varios motibo pakico tin e desconfianza aki. Kico exactamente e motibonan ta no ta conoci, mirando cu Eman a bisa di no por elabora riba nan tanten cu no a combersa cu ambos.

Ta trata di Director General Luis Oduber y Director Financiero Randolph Ruiz, cu segun informacionnan cu ta circula pa algun siman caba, a haya notificacion di Utilities cu kier nan funcion.

Segun ing. Richard Eman e intencion tabata pa reuni cu ambos Director prome cu tuma decisionnan concreto, pero pa su sorpresa, ambos ehecutivo di WEB a baha cu vakantie y no ta na Aruba. Como tal a pospone e reunion pa dia 2 di Augustus proximo, esta Dialuna awor.

Kico ta e tema di discusion no ta conoci y e Director di Utilities no kier a amplia, solamente bisando cu no tin un solo punto cu no ta mucho contento cune, pero cu ta warda e reunion di Dialuna awor pa mira kico ta bay pasa.

Eagle LNG

Sinembargo, aunke cu e Director di Utilities no kier a duna motibo pa e desconfianza, e tabata obvio cu Eman no ta contento con WEB a maneha e negociacionnan cu Eagle LNG. Manera ta conoci, Eagle LNG a gana e destaho publico pa bin cu un almacenamento di gas natural na Aruba, unda entre otro lo a abastece WEB cu e combustible aki. “Gas natural ta mucho mas bentahoso, compara cu HFO (Heavy Fuel Oil) cu WEB ta usa awor aki. No solamente e ta mas barata, e ta mas limpi tambe. E ekipo na WEB lo opera miho cu gas compara cu HFO, mas eficiente, particularmente pasobra gas ta mas limpi.” Eman a mustra cu uso di gas en bes di HFO ta nifica menos mantenemento di e ekipo na WEB y menos gasto.

Negociacion

No ta di awor ta den contacto cu Eagle LNG, Eman a sigui bisa. For di momento cu WEB a cuminza cu sondeo pa cumpra gas natural pa haci e cambio pa otro tipo di combustible, tabata tene combersacion caba cu Eagle LNG. Esaki prome cu e compania a expresa interes pa establece su mesun terminal na Aruba. “WEB tabata den combersacion cu varios compania,” Eman a sigura.

Sinembargo, na momento cu Eagle LNG a gana e destaho pa bin cu su propio proyecto, su propio planta, Utilities a dicidi cu ta ora pa WEB NV mes hiba e negociacionnan pa yega na un acuerdo di compra di gas natural for di e compania. A laga e negociacionnan den man di ehecutivonan di WEB. Pero despues di lunanan di negociacion, e partidonan pa un of otro motibo no por a yega na otro, te cu Eagle LNG a cuminza duda hasta si kier sigui cu su proyecto na Aruba. E falta di disponibilidad aki pa yega na un palabracion pa compra di gas natural y e hecho cu e compania Eagle LNG a mustra cu no ta sinti cu WEB ta convenci pa yega na un contra, no a cay den bon tera cerca e Director di Utilities. Eman no por compronde con WEB no por a negocia un bon acuerdo na interes di e planta y awor ta pendiente kico ta e posicion di Eagle LNG, si nan ta dispuesto pa warda un poco mas y lo por reanuda negociacionnan.

En todo caso, e Director di Utilities a mustra cu e compania madre di tanto WEB y Elmar ta kere den uso di gas natural, banda di henter e pakete di energia renobabel cu kier presenta y si no ta cu Eagle LNG, e lo ta cu otro compania.

En todo caso, ingeniero Eman a admiti si cu Bon Dia Aruba cu e postura di ehecutivonan di WEB den e negociacionnan cu Eagle LNG no a sinta bon y e ta spera cu por surpasa esaki proximamente, na interes di WEB. “Utilities no tin e autoridad pa drenta e negociacion atrobe. E ta tereno di WEB y nan mester yega na un acuerdo.”