Director SVB Edwin Jacobs: Fondonan di pensioen y di malesa bou presion, pero no den crisis

Fondo di pensioen di biehes no ta confrontando un crisis agudo. Mas ainda, ya SVB a calcula ki tempo lo mester haci ahuste y inyeccion financiero pa mantene solvabel y stabiel pa sigui paga pensioen. Y hisa e edad pa 67 no ta hunga un papel pa mehora e situacion di fondo. Asina Director di SVA Ing. Edwin Jacobs a bisa Bon Dia Aruba.

E situacion economico di Aruba ta den crisis y hopi hende a perde trabou, ademas cu hopi a perde parti di nan salario. Den lunanan di April te cu Juni, prima di AOV a cay cu 30 porciento. E caida tabata uno grandi pero SVB a kere cu e lo ta mas y esey tabata un bon noticia. “Nos a kere cu a caida lo tabata mas grandi.”

SVB ta bisa cu locual a yuda tabata e subsidio di salario, cu toch a percura pa un inyeccion di alrededor di 7 a 8 miyon tur luna den e fondo. Pero tabatin caida den prima, di 25 miyon pa 16 miyon. Despues di luna di Juni, SVB a ripara mas actividad economico, cu a yuda mitiga e perdida den e contribucion di e fondo di pensioen.

Presion riba reserva

Locual si a pasa ta cu e caida den contribucion a pone presion riba e reserva cu segun plan, a acumula te comienso di aña. Segun Jacobs, 2019 tabata un bon aña pa reservanan di SVB, y ta premira ta cu danki na e maneho, e reservanan lo por wanta te cu fin di 2020. Tur cos ta depende riba e velocidad cu economia lo recupera y te ainda e expectativa ta cu e lo dura dos pa tres aña. Mas lihe economia drecha, mas lihe por cuminsa traha riba reserva. “Pues e situacion di fondo di AOV berdad ta precario pero menos cu nos a spera. Pa loke ta seguro di malesa, e caida ta 20 porciento na entrada cash cu nos tin. Esey tambe ta sorprende nos. Nos a calcula cu e caida lo tabata 30 porciento.”

E subsidio di salario a yuda hopi, pasobra esey tabata e condicion pa dunadonan di trabou haya e sosten. Esta cu mester sigui cu e pago na fondonan social.

No tin bista sinembargo te ki tempo e pandemia lo continua y SVB ta sigui e desaroyo aki, particularmente riba e aspecto economico. Pasobra e lo por nifica ahuste nan na e fondonan. Segun ley, Pais Aruba ta para garantia si e fondonan no ta suficiente pa cumpli cu obligacion.

AO melding

Locual a pone presion riba e fondo di malesa tabata e grupo den cuarentena durante Maart y April. E cantidad, cu ta inclui hasta e familiarnan cu mester a keda den cas y no por a traha, a percura pa hisa e cantidad di AO (Arbeidsongeschiktheid). Segun tratado di ILO (International Labor Organization), tur persona cu a bay den quarantena tabatin derecho riba nan pago di SVB y varios a keda pa simannan ta cobra. “Tur e personanan cu tabata den cuarentena oficial a influencia e cantidad di hende AO. Na April, e cantidad, e suma cu mester a paga tabata 15 % mas halto compara cu e aña prome. Na Mei ya a ripara mehoracion. Pues na Mei, e cantidad di hende afecta a cay.”

Di otro banda, Jacobs ta reconoci si cu na Mei hendenan cu tabata riba e areglo di ‘no work no pay’, no tabata ricibi sosten di SVB si nan tabata malo. Pasobra SVB ta paga si tin entrada. “Si riba e dia cu no ta traha no tin salario, SVB no por paga un porcentahe di nada. Den e luna di April tabatin hopi hende cu no tabatin entrada. Ta na fin di Mei a cuminsa habri sectornan, pa hende por ricibi entrada. Y hopi sector a bay na sector no work no pay.” Esey tabata momento tambe cu FASE a drenta na vigor y como 11 pa 12 mil hende mester a depende di e 950 florin. “E pago aki a bay pa un grupo cu no tabatin ningun otro entrada cu no ta FASE, manera esnan cu ta traha na beauty shops, y otro.”

AO cu subsidio di salario

Na e momentonan aki mester tene cuenta cu e hecho cu hopi trahado ta ricibi menos salario. E areglo di AO sinembargo ta keda mescos. Pues, segun regla por ricibi beneficio di malesa despues di 3 dia di ta malo. E trahado ta ricibi 80 porciento di su salario real di dia. Si a meld na Mei, y e subsidio di salario tabata 60 porciento, kiermen e trahado ta ricibi 80 porciento di e 60 porciento for di SVB. Pero Codigo Civil ta bisa cu un trahado tin derecho riba 100 porciento di su salario real. E ta nifica cu e doño di trabou mester complementa e diferencia. Si un persona ta gana normal 100 florin, y na Mei tabata ricibi 60 porciento, pues 60 florin, e ta nifica cu SVB ta paga 80 porciento cu ta 48 florin y e dunado di trabou mester pone e otro 12 florin. SVB mes ta percura pa e proceso cana bon pa e 6 simannan cu e areglo ta rekeri. Ainda no tin e cifranan di e cantidad di AO di Juni, pero en todo caso, SVB ta controla si e trahado a ricibi su subsidio di salario.