Director di Post Aruba Guillemo Raymond ta considera e situacion di incertidumbre di nan trahadonan expresa pa nan sindicato Seppa, como un capitulo cera. “Rumornan asina semper ta causa un panico.”

E preocupacion expresa pa Seppa relaciona cu draaiboek pa reduci personal di post ta rumor so, segun sr. Raymond.  E ta haya cu e rumor aki a wordo trata debidamente. Minister concerni hunto cu directiva di Post a traha un carta pa tur e personal  recientemente caminda nan a informa cu “no tin niun lista pa manda niun hende cas. Esey a wordo aclaria”.

Actualmente Post Aruba tin 108 trahado. Sr. Raymond a laga sa cu servicio postal den su structura nobo como un NV di  gobierno no ta mas e postkantoor di antes caminda tabata haci politica cu ne. Actualmente e proceso a cambia completamente compara cu e tempo di entrega di carta. Nan ta structurando nan servicionan te hasta nan a yega di tuma hende pa e parti di financia y otro seccionnan cu nan tin y te hasta hendenan cu ta parti carta tambe.

“E politica no tin influencia den dje.”  Pero te ainda e gasto mas grandi cu Post tin ta su personal.  Cu e introduccion di servicionan nobo nan ta spera cu no mester corta tur cos. Nan ta manehando e gastonan di un manera “cu  niun hende mester bay cas.”

Traha mas eficiente
Personal lo haya uniform nobo denter di poco  pa esunnan cu ta parti carta, asina e director ta sigui conta. Algo cu nan  kier duna prioridad ta pa trece mas eficiencia. Ora cu nan ta bin cu e topico aki ta wordo mira den un luz negativo,  pero na final e ta haya cu  lo resulta na beneficio di e mesun empleadonan.  E no tin di haber cu reduci trahadonan, pero esey no ta kita cu no lo bin cu un transformacion den e servicio postal, ya cu esaki ta necesario pa nan clientenan y den general pa nos comunidad.

Mas siguridad pa proteha personal y paki
Tin cambionan cu ta tumando luga den post mes, ya cu e cartanan a wordo basicamente reemplasa pa e cantidad di paki cu nan ta entrega tur dia.  Den futuro sr. Raymond  ta wak cu e paki lo ta bay ta e negoshi cu post ta bay ta dilanti di dje.  E servicio di e-post  of on line shopping ta e principal fuente di entrada na Post . Nan clientenan a subi di 4 mil cliente na 2015 pa mas cu 6 mil miembro na final di 2016.  E tipo di mercancia cu ta drenta ta varia,  entre nan television, tire di auto, etc..

E cambio aki ta trece retonan nobo entre nan bin cu mas sistema di siguridad pa garantisa cu e pakinan no ta wordo perdi of habri. Nan a pone un persona encarga cu e parti di siguridad di procedura postal debidamente capacita pa haci e trabou aki. Tambe nan a introduci camaranan den post pa proteccion di nan  propio personal  y tambe di e productonan. “E balor di nos productonan a cambia. Y tambe nos mester a bin cu mas siguridad”, segun e director  Antes tabata gewoon carta of pakinan cu pañanan uza, pero debi cu nan producto a cambia y nan a bira di mas balor, nan mester a bin cu cambio pa siguridad di nan productonan y di nan trahadonan.