E prome reunion “Gevangenisdirecteurenoverleg” a tuma luga dialuna na Aruba, unda cu esunnan responsabel pa maneho di e prizonnan na Corsou, Boneiro, Sint Maarten y Aruba ta topa pa discuti retonan, solucionnan y otro topiconan di interes mutuo. E reunion ta e prome paso haci pa yega na colaboracion formalisa entre e directornan di prizon di nos region.
Director di Korrektie Insituut Aruba (KIA), esta Rocco Tjon, a comenta cu na e reunion a discuti topiconan cu ta relevante pa tur e institutonan cu e meta pa yega na cuminsa traha hunto y segun e mesun normanan. E retonan cu prizonnan ta confronta no ta unico, pero ta retonan cu internacionalmente prizonnan ta haya nan mes confronta cu nan y ta cumbini y ta importante pa traha hunto como cu tur e prizonnan, sigur den e region aki, ta wordo evalua pa e mesun organisacion internacional cu ta mira e mesun aspectonan durante di nan inspeccion, manera CPT.
CPT ta un organisacion Europeo, esta “Comité voor de Preventie van Foltering en Onmenselijke of Vernederende Behandeling of Bestraffing” (Comision pa prevencion di tortura y trato of castigo inhumano of denigrante).
Rocco Tjon a splica cu entre e puntonan di discusion mas importante, tabata e educacion (scholing) di e personal pa medio di training y cursonan cu e meta pa mehora e calidad di e producto y infrastructura. E director di KIA a remarca cu nan mester di un inversion cuantioso, ademas di e suma inverti caba den renoba e tres halanan cu a wordo afecta pa un candela grandi dos luna pasa.
KIA awo tin tres blok di cel hopi bunita y ta bay haci afspraaknan concreto cu e detenidonan y e personal pa mantene e halanan aki di e calidad cu nan tin awo, el a bisa. Un otro aspecto cu ta canando su caminda actualmente cu sigur ta bay eleva e siguridad den e instituto pa e personal ta e proyecto di camara, Tjon a agrega.
E reunion entre e directornan di prizonnan regional lo conoce ampliacion y follow up necesario den e proximo lunanan.
Comunicado
