Mediante esaki, Organo Ehecutivo di AZV (OE AZV), ta rechasa totalmente e intento di crea duda den comunidad tocante e posicion financiero di e fondo di AZV den futuro. Ademas, OE AZV ta reitera cu bao di tur circunstancia e pago di e gastonan di e fondo AZV ta garantisa pa Pais Aruba, mediante e asina yama “landsbijdrage”.

Siman pasa, OE AZV, como parti di su plan di informacion y pa mas transparencia, durante un conferencia di prensa a presenta na comunidad su relato anual di 2023. A constata cu e relato a trece su debido discusion cu ne, cual sigur ta saludabel ya cu e seguro general ta di henter comunidad.

Instrumento di maneho nobo

Banda di su relato 2023, OE AZV a presenta tambe e instrumento di maneho nobo cu a introduci oficialmente e aña aki pa reemplasa e recorte di 60 miyon florin den gastonan, esta su Cuadro Financiero Multi Anual (CFMA). Un parti esencial di e CFMA ta e modelo di proyeccion di gasto y entradanan cu a keda desaroya pa expertonan local; tanto di den AZV como pafor di AZV. Cu e modelo di proyeccion aki, OE AZV ta haya na su disposicion un instrumento balioso pa sigui maneha e fondo pa futuro.

Cuadro Financiero Multi Anual

Anteriormente tabata nabega “ciego” pa futuro. Tabata calcula gastonan di AZV pa maximo dos aña. Kico lo por a pasa despues, no tabata tin mucho idea. Solamente por a bisa cu e gastonan lo sigui subi, pero no por a indica na ki grado e gastonan lo desaroya. Cu e introduccion di e modelo di proyeccion; awo por calcula kico ta spera e fondo pa e proximo 15 pa 20 añanan. Basa riba e resultadonan di e proyeccionnan, por tuma e pasonan necesario pa cambia rumbo di e desaroyo.

Proyeccion te 2040

Durante e conferencia di prensa, OE AZV a presenta e prome resultado di e modelo di proyeccion. Den un grafico a mustra con e expectativa ta pa loke ta e desaroyo di tanto e resultado como e reserva di e fondo te 2040. E proyeccion ta indica cu despues di crea reserva e proximo añanan, mey mey di añanan 30, e reservanan lo agota y lo depende atrobe di contribucion di gobierno. E proyeccionnan ta implica un tarea importante pa maneho di e fondo. Di un banda, gobierno lo mester sigui esforsa pa mehora e cumplimento cu e leynan cu ta percura pa entrada pa e fondo. Di otro banda, OE AZV mester keda esforsa su mes pa haci e sector di cuido medico mas eficiente pa asina contene (na un forma responsabel) e crecemento di e gastonan. Pues, a base di maneho, por pone cu e agotamento di e reservanan ta keda posponi te un momento mas laat den tempo. E ta nifica tambe cu accionnan den maneho ta cambia e grafico y cu regularmente ta keda monitor e situacion.

E cambio principal

Cu introduccion di e modelo di proyeccion y e Cuadro Financiero Multi Annual, Aruba ta uni na e fila di paisnan desaroya cu ta uza instrumentonan sofistica pa prepara nan mes pa futuro. Aruba por tin trankilidad cu e posicion financiero di AZV ya no ta un riesgo pa e presupuesto di Pais Aruba y ni un riesgo pa e presupuesto di famianan na Aruba. Aruba ta den e “driver seat” pa loke ta su gastonan di AZV, despues di 23 aña di su introduccion. Motibo suficiente pa nos ta orguyoso di nos mes como pueblo y como pais.