Pa FCCA 2019 tabata un aña cu basta desafio, pero nan departamento ta sinti cu a realisa varios proyecto cu nan a propone pa nan mes. E director a duna bista riba algun proyecto cu tin pendiente pa 2020.

Director Edwin Tromp a bisa cu pa 2019 nan a traha riba diferente proyecto, pero nan ta nota cu peticion pa cas ta birando mas hopi. Tambe tin un situacion critico, unda cu e necesidad grandi ta aumentando.

Tromp ta duna di conoce cu na momento actual no por haya cas pa tur hende, pero nan ta purba ubica y yuda nan cu luga pa nan por biba. Nan a caba cu un proyecto na Savaneta y Cunucu Abou; nan a caba cu Santa Cruz y a sigui na San Nicolas, pa despues bay parti di Tanki Leendert.

71 cas na San Nicolas.
Na San Nicolas nan tin construccion di 71 cas. “Esey a pasa e aña aki. Tambe nos a premira pa otro; obviamente nos ta wardando basta caba. Nos ta wardando un evaluacion di DIP pa Santa Cruz y Rooi Bosal”, el a bisa. Tambe na San Nicolas tin tereno grandi cu nan lo bay traha riba dje otro aña.

El a menciona cu tambe nan a haci actividad den grupo, unda cu a bin cu diferente wega di veld. Tromp a bisa cu na februari, nan fundacion a haci 50 aña y a celebra cu plan di bingo, bustrip y deporte den bario.

Tromp ta comparti cu nan ta mira esey cu placer pa wak e reaccion di hende cu ta huur of cumpra cas ,‘nan ta aprecia esey’. E ta pensa cu ta nan deber pa e bario ta mas presente, y no solamente pa bishita pero pa haci actividad.

Di FCCA nan ta haya cu e parti administrativo a bay bon y nan kier bay den 2020 den mesun direccion. “Nos atencion ta keda den mas construccion’. Pa 2020 tambe nan tin algun otro proyecto pa cual e producto cu ta bay uza, lo bin di Colombia.

Sinembargo e producto mester ta aproba pa DOW pa por deal cune. “Nos no por traha sin cu e ta aproba. Tambe tin un fabrica na Santo Domingo cu mester warda pa aprobacion. Nos no kier keda solamente na un sistema, pero nos mester wak si ta cumpli cu rekisito. Tambe mester evalua di unda e ta bin, manera e region”.

A puntra Tromp pa locual ta trata demanda pa aplicacion, si tin un plan B pa wanta e situacion di cas. Tromp ta contesta cu nan lo sigui traha. No tin plan B pasobra no tin cas pa hende bin, pero nan ta evalua si pa esunnan si tin un apartamento bashi y nan por yuda un persona mesora.

Tambe tin e parti di renoba y algun otro proyecto cu tereno ta bashi cu casnan cu persona por uza riba termino cortico. “Si nos ta wak cu nan ta den necesidad. Nan ta pone pa 6 luna asina nan por ta mas comodo y yuda esunnan cu ta den situacion preta.”

Nan mensahe di fin di aña pa tur hende den comunidad di Aruba, esunnan cu a yuda nan fundacion den cualkier forma, departamento di gobierno, prensa, tur contratista y trahado un feliz dianan di fiesta y feliz aña 2020.