E posibel direccion con ta bay yega na edificio pa Duane ta defini, pero no e acuerdo. Aki seis luna lo mira si e e ta realisabel y cu berdad Bohama lo traha e edificio a cambio di e tereno di Duane Kantoor bieu na LG Smith Blvd 84. Asina Director di DOW Ing. Marlon Croes a splica Bon Dia Aruba.

Marlon Croes di DOW a tene un conferencia di prensa pa a aclarea varios punto cu media
social y entre otro Bon Dia Aruba a trece dilanti. “A sigui tur informacion cu a keda publica y a bisa cu ta eroneo. Nos ta contento si cu e informacion ta sali, pasobra ta tene nos skerpi pa nos por haci nos trabou.

Croes a duna henter un relato con henter e proceso a bay for di principio te cu awor.
Tabata na 2015, cu Departamento di Duane mester a sali di e edificio bieu y e personal
mester a keda reparti den diferente edificio rond di Aruba, cu intencion cu nan lo haya
edificio nobo. Na 2016 a organisa un competencia di diseño, un asina yama ‘prijs vraag’ pa
un edificio nobo di Duane na Barcadera.

A traha un documento cu tabata na benta pa arquitectonan participa na un balor di 50 florin. E diseño di e edificio no por a surpasa e gasto di construccion di 7.5 miyon florin. Un hurado di 7 experto, for di arquitecto te personanan di finanzas y representante di Duane mes a evalua e 12 diseñonan cu a keda entrega y e diseño titula ‘Expanded Limits’ di PMEC a gana e competencia.
“Pareu cu ne, a tene un inscripcion publico pa por otorga e tereno di erfpacht di e kantoor
bieu na LG Smith Blvd 84. A traha un documento cu tur rekesito, incluso e condicionnan bou cua por a cumpra e tereno. Esnan intere sa por a cumpra e documento aki cu tabatin e balor di 1500 florin. Tres candidato fuerte a cumpra e documento cu e intencion pa participa na e destaho publico. E suma cu mester a hinca tabata 11.6 miyon florin cu ta inclui balor di tereno mas edificio. Esey tabata basa riba un taxatie rapport di 2016. Durante e destaho ey, 7 December 2016, no tabatin ningun inscripcion. Pues no tabatin oferta. “Ningun hende tabata dispuesto pa paga e prijs ey.”

Bohama a acerca Gobierno
Na 2018/2019 a ricibi dos proposicion pa e propiedad. Uno di Bohama y otro di WindCreek.
Windcreek tabata e unico cu un relacion cu Meta Corp cu a cumpra e documento di 1500 na
2016, pero cu finalmente no a participa na e destaho.

Na December 2020 a bolbe haci un taxatie rapport nobo, y aki a nota cu e balor a baha, di
11.6 miyon pa 9.9 miyon florin, reparti na 3.1 miyon pa edificio y 6.8 miyon pa e edificio.
Esey ta ekivalente na 1692 florin pa meter cuadra. “Ta papia di den medio di comunicacion
di 4000 a 5000 florin pa meter cuadra. Nos tin deseo pa e yega eynan berdad, pero mester
haci hopi trabou como Gobierno y sector priva pa embeyece y haci e area asina atractivo cu
e prijs ta bay subi na 4 a 5000 florin pa meter cuadra.

E oferta di e dos companianan a habri e posibilidad pa DOW busca opcion pa mira kico por
haci y na 2021 a traha un matrix di evaluacion, pa pone tur e opcionnan cu Gobierno
tabatin. Uno ta pa Gobierno financia e edificio diseña pa PMEC na e balor adapta na e
indice di inflacion di 2021. E costo na 2016 tabata di 7.2 miyon y cu e ahustacion di inflacion
e lo a sali un poco mas. Tambe tabatin opcion pa renoba e oficina existente, na un suma di
6.1 miyon florin. E diferencia relativamente chikito entre drecha of traha edificio nobo a
pone DOW determina cu ta consehabel pa traha e nobo na Barcadera. “Nos tabatin e opcion
di Windcreek, di Bohama of basha e edificio abou.”

DOW a conseha oferta di Bohama
Despues di evaluacion, a conclui cu e oferta di Bohama ta esun cu ta cumbini Aruba mas.
Pasobra Duane lo haya kantoor nobo, lo kita e edificio bieu y traha uno nobo. “Ta elimina un
parti scur den e contexto di ciudad, y ta stimula vivienda y actividadnan nobo den
Oranjestad y Caya Grandi, cu ta loke kier stimula den e area. Y eventualmente por atende e
lista di DIP riba e necesidad di ‘Young Professionals’ pa tereno of vivienda pa medio di
proyecto aki. A base di esey, a conseha Gobierno pa explora e proposicion di Bohama.”
Minister di Infrastructura y Minister di Finanzas a firma e Decreto Ministerial pa duna e
grupo di trabou e tarea pa sigui explora e posibilidad. Ta trata di Direccion di Finanzas, DIP,
DWJZ, Duane y DOW. E trabounan a para pa motibo di eleccion y awor cu tin Gobierno
nobo, Prome Minister a firma un MoU, cu ta un acuerdo cu ta bay sigui traha hunto sin cu
tin un compromiso, pa asina busca e miho prijs y miho condicion y bou cua condicion y bou
margen di cua ley por traspasa e tereno. Y si yega na un acuerdo cu ta satisfactorio pa
Gobierno, pa sector priva haci e inversion. No tin ningun compromiso cu Bohama ta bay
hay’e. Awor ta bay mira si Bohama por cumpli cu tur e condicionnan cu ley ta stipula.

5 miyon
E suma di 5 miyon no ta estableci ainda. E ta indicativo y ta awor ta bay explora tur e
posibilidadnan cu por usa, sea ta e asina yama ‘balor economico, balor di reconstruccion
(herbouwwaarde), e potencial economico.’ E suma ta uno global (ballpark figure) basa riba e
prome scenarionan cu a core den un modelo matrix unda cada potencial a haya un score.
Tambe a pone den scenario si Bohama lo por a paga e suma aki cash na Gobierno y despues
ta hinca e suma den e edificio. E diferencia di dos miyon y pico lo ta financia pa Bohama e
ora. “E acuerdo ta pa nos sondea e posibilidadnan aki. No tin un compromiso duro ainda,”
Ing. Croes a enfatisa.

Na e momento aki e grupo di Direccion di Finanzas, DWJZ, DIP, Duane y DOW lo bay traha
riba e analisis di e diferente opcionnan, condicionnan y a base di cua ley por logra e ‘swap.’
En todo caso, mester evalua si ta duna e tereno como propiedad a cambio di e construccion
di e edificio nobo of ta duna den erfpacht. Por ehempel, si duna den erfpacht, sin tene
cuenta cu e balor di e tereno lo subi, e canon di 6 porciento lo nifica un entrada pa Gobierno
di 24 miyon den 60 aña, basa riba un pago anual di 400 mil. Pero ainda no a yega asina leu
pa determina cua ta cumbini Gobierno e momento aki. “Aki seis luna nos lo tin tur e analisis
cla y e ora nos por yega na un acuerdo concreto, basa riba un cuadro legal,” Croes a bisa
Bon Dia Aruba. “E MoU firma cu Bohama ta duna e tempo pa explora e posibilidadnan pa
yega na un acuerdo cu ta combini Gobierno. Den caso cu no logra, e posibilidad ta habri pa
otro compania por entrega nan proposicion,” Croes a bisa na final, agregando cu mas tempo
e edificio na LG Smith para bashi, sin destinacion, mas su balor lo baha y a lo largo, balor di
tereno di henter e area.