Director di Banco di Seguro Social (SVb), Edwin Jacobs a declara na Bon Dia Aruba cu e tambe a tuma nota den social media cu un oficina di abogado a informa publicamente riba un caso di un trahado cu a notifica AO, y a bay pa controla cerca e dokter di SVb, sinembargo a wordo retira.
Sr. Jacobs a bisa cu e no a lesa e sentencia mes “pues mi no por bisa mucho”. Pero nan lo bay pidi e sentencia pa wak kico e ta; y asina duna mas informacion na comunidad.
E caso tambe a trece otro comentarionan dilanti. Sr. Jacobs ta comenta bisa cu den varios ocasion el a yega di trece dilanti cu pa loke ta trata seguro di SVb, “e huicio di e dokter di control (di SVb) ta esun cu ta pisa”. El a agrega cu a base di e huicio aki di nan dokternan di control, nan ta determina di paga beneficio tambe. Na mas di un ocasion, colegio di apelacion di SVB a haci e ponencia cu ta e dokter di control ta esun cu ta determina incapacidad (AO) di e trahado.
Dokter cas of specialista
Esaki ta nifica tambe segun director di SVb- cu si un dokter di cas bisa cu un trahado no por traha, pa SVb e no tin efecto. Igualmente si un specialista ta bisa cu e trahado no por traha, pa SVb e no tin efecto tampoco. “E unico caminda cu tin efecto, e unico autoridad riba e tereno aki pa cu e seguro di malesa y accidente, ta e dokter di control di SVb.”
P’esey e ta considera importante cu den caso cu specialistanan tin un opinion y tambe dokter di cas tin un opinion, pa nan suministra SVb su dokternan tur informacion necesario. Pa asina e dokter di control di SVb por tene cuenta cu esaki den su evaluacion.
Caso den corte
Manera Bon Dia Aruba a skirbi den su edicion di ayera riba caso unda e compania a dicidi di kita e trahado como cu el a nenga e instruccion di e dokter di empresa. Mientrastanto SVb a considera e trahado incapacita pa traha. E trahado a bay corte y el a gana su caso.
