Den nos edicion anterior a keda publica un articulo tocante e biahe di Minister di Labor, Energia y Integracion, Glenbert Croes, hunto cu un delegacion di Aruba pa Groningen den preparacion pa e reactivacion di e zona di refineria cu lo wordo transforma den un ‘Hydrogen Valley’.
Director di WEB, sr. Alfredo Koolman, ta a forma parti di e delegacion aki y den un video publico ariba e pagina oficial di Facebook di Gabinete Wever-Croes, el a splica tocante e bishita y con esaki lo yuda Aruba pa cuminsa cu e proceso aki.
“Nos a bishita diferente luga caminda nan ta desaroyando e concepto di Hydrogen Valley. Nos a mira e parke di molina di biento, nos a tende tambe di tur e plannan cu nan ta trahando riba dje y e plantanan cu ta genera coriente den e region. Nan tambe ta interesa den genera hidrogeno di forma cu nan por usa e gas ey como combustibel pa nan autonan, pero tambe pa genera energia y genera electricidad,” Koolman a indica.
El a splica cu na e region cu nan a bishita nan por a wak con e concepto di produci hydrogen y uz’e no solamente pa energia, pero tambe pa transporte. El a sigui splica cu na diferente caminda nan por a wak ehempel bunita den e ultimo dianan, no solamente den e parti di Delfzij, pero tambe den e parti di e plantanan di energia y tambe den e region banda di aeropuerto caminda nan por wak tur loke nan tin y nan a bishita tambe e stacion di bus.
“Hopi impresionante pa wak con nan ta realisando e cosnan aki stap pa stap y mi ta kere esaki ta sirbi como bon ehempel pa nos na Aruba caminda tambe nos ta bay inicia e concepto y proceso aki caminda nos por yega na desaroya nos mesun hydrogen valley den e region di San Nicolaas riba tereno di refineria. Pues nos ta hopi positivo pa locual nos a mira aki y nos ta sigur cu hunto cu e stakeholdernan, nos gobierno, nos minister, cu nos lo desaroya e plan aki den e siguiente simannan,” el a finalisa.
