E pandemia di e Coronavirus/Covid-19 y e crisis cu e virus aki a trece cune mundialmente y den nos isla, ta mustra nos diferente tipo di informacion. Un di nan tin di haci cu e trahadonan stranhero cu a bin Aruba pa traha, y asina yuda economicamente nan famia den nan pais natal.

Roberto Gracia kende ta director di Union Caribe, e ta un empresa di manda divisa pa exterior, estableci na Aruba pa casi 23 aña caba. El a bisa cu apesar cu e situacion di e Covid-19 tin su impacto riba nos economia y mercado laboral, e trahadonan stranhero ta percura pa manda ayudo monetario pa nan famia afo. Te ainda esaki ta e caso, pero e ta premira cu esaki lo cuminsa baha entrante otro luna, y pa luna di mei e situacion lo bira mas dificil.

Sinembargo e ta haya sorprendente cu e hendenan aki, mayoria di nan ta traha den e sector hotelero, construccion y trahado domestico, ta sigui manda ayudo pa nan ser keri. Apesar cu eventualmente algun di nan ta cobrando aworaki su ultimo salario. “Semper ta sorprende nos cu e ser humano, meymey di e crisis ta bira mas solidario, el a bisa.

E comportacion aki, te ainda no a conoce excepcion. Ya cu den diferente crisis y reto cu nos pais a yega di pasa aden -aunke e impacto tabata menos- pero ‘semper e comportacion di e trahadonan stranhero ta uno di solidaridad completo pa nan famianan y amistadnan di nan pais di origen.” E hendenan aki ta cobra nan salario, y mesora nan ta bishita e compania aki pa asina nan por cumpli cu nan deber of compromiso cu nan ser keri afo. Of tambe pa mustra nan solidaridad cu nan famianan y amigonan.

Solidaridad

Union Caribe ta un compania cu ta opera na Aruba, Corsou y St. Maarten. Na Aruba y Corsou nan principal clientenan ta: Colombiano, Dominicano, Peruano, Ecuatoriano, y otro nacionalidad mas. E motibo principal cu nan ta manda placa afo ta ayudo familiar. Nan no por manda cantidad grandi di placa. P’esey e ayudo aki ta wordo yama ‘remesa familiar’ y Banco Central ta controla e tipo di operacion aki.

Logicamente e fin di luna aki e volumen a baha un poco compara cu otro lunanan. Pero te ainda nan por sigui habri pa sigui brinda nan servicio. E ta spera cu e situacion aki pronto nos lo por sali di dje cu ayudo di henter comunidad. Pero mirando e situacion cu Merca ta pasando aden debi na e Covid-19, y considerando cu e pais ey ta nos principal mercado turistico, Covid-19 lo sigui afecta nos industria turistico colateralmente tambe. Pero tur cos ta depende con largo e crisis aki lo por dura.

E ta haya cu e momento cu nos ta pasando aden ta exigi sacrificio di cada un di nos. E clase empresarial segun director di Union Caribe- no por bira un excepcion y ‘nos mester mustra nos solidaridad cu nos empleadonan,’ el a bisa. Tambe e ta haya cu e doñonan di local mester duna un descuento na nan huurdo. “Esaki ta un cuestion di solidaridad total.” Tanto e empresarionan como e trahadonan, mester por a spaar placa, pero e ta consciente cu un parti di nos clase trahado, no tin e cultura di spaar.

Roberto Gracia kende tambe ta fundado y pastoor di Iglesia Ordres Nuevo a bisa cu nan enfoke ta esun di brinda ayudo social. Nan ta duna conoce e palabra di Dios y di dos luga, nan ta brinda asistencia social.

Durante e ultimo tres aña nan a yega di brinda ayudo na comunidad Venezolano cu tin necesidad. Awor dor di e crisis causa pa e Covid-19, nan lo cuminsa duna ayudo social na e miembronan di nan iglesia y tambe na e hendenan cu mester di dje.

Entre ayera y awe nan a cuminsa traha macutunan cu productonan comestibel pa entrega nan, prome cu e ‘shelter in place’ ta drenta na vigor. E ta preocupa ya cu tin hende cu mester di e ayudo aki, pero awor cu e ‘shelter in place’ ta wordo ehecuta, nan no por brinda e ayudo humanitario aki. Na final el a manda un mensahe di speransa pa henter comunidad. “Nos mester tin speransa den Dios,” el a bisa.