Trahadonan di horeca cu no tin un salario regular sino cu nan ta gana 8 florin pa ora mas comision di 4% di benta. E keho cu ta drenta ta cu na Banco di Seguro Social (SVb) e empleadonan aki ta gewoon inscribi pa 8 florin pa ora sin comision. Pues nan ta wordo inscribi cu un salario cu ta representa bou di e minimum loon, mientras cu SVb tin cu paga minimum loon ora di meld ziek.

Director di SVb, Edwin Jacobs a declara na Bon Dia Aruba cu e asunto aki tin dos parti. E prome tin di haber cu e salario cu e trahado ta wordo sigura na SVb, ta e sueldo cu ta wordo pasa na e institucion aki pa e doño di trabou. E ta pasa esaki, ya sea mensual of anual y a base di esey nan ta calcula e sueldo diario. Of e mesun dunado di trabou ta pasando SVb e dato di e sueldo diario.

Jacobs a laga sa cu den e proceso aki, SVb no ta esun cu ta bay determina si e sueldo ta un sueldo husto of no. “Nos ta sali for di punto di bista cu e sueldo ta un areglo entre e trahado y e doño di trabou”, el a bisa. E unico caminda cu SVb ta monitor cu e sueldo ta cuadra cu sueldo minimo ta ora cu trata trahadonan cu permiso di trabou. “Eynan si nos ta vigila pasobra e sueldo no por ta bou di sueldo minimo”, el a laga sa.

Den otro casonan cu e doño di trabou indica cu e sueldo ta un sueldo minimo, e por ta un consecuencia cu pa ehempel e trahado no ta traha 40, 44 of 48 ora total. Sino cu e por ta trahando part-time, y tur esaki ta posibel ora cu ta inscribi un trahado na SVb. Director di SVb tin cu bisa cu e sueldo a base di cual nan ta paga cu ta e sueldo sigura na e instituto aki, ta un sueldo cu e doño di trabou ta suministra SVb cu ne. “Nos mes no ta haci nada y nos mes no ta touch’e tampoco”.

Excellsheet cu diferente componente
Loke si SVb ta bin ta constata cu a base di ley e sueldo cu tin cu wordo sigura ta consisti di diferente componente. Y no tin un bon comprension cerca un grupo di doño di trabou y trahado riba kico tur ta e componentenan di un sueldo cu un trahado ta sigura cu ne. Actualmente SVb ta desaroyando un excelsheet pa pone riba nan website pa yuda e doñonan di trabou y trahadonan. Jacobs a indica cu no mas tarda cu 15 di februari nan lo pone esaki disponibel via on line, esta www.svbaruba.org , caminda nan lo por haya manera un guia di kico ta e componentenan di e sueldo sigura.

Di e forma aki nan por yena nan riba e excellsheet y a base di esey determina tambe e sueldo sigura pa dia. Un sueldo sigura cerca SVb ta contene e sueldo basico cu ta wordo paga, pero tambe e ta contene comision, point, etc… y otro comision cu e trahadonan ta haya. E ta contene tambe placa di vakantie, si tin un suma fiho den contract pa bono di fin di aña tambe e ta conta aden. Si tin un toeslagen pasobra e persona ta traha riba un servicio continuo di tres pa cuater warda y e ta haya un extra compensacion, esey tambe entre e componente di un sueldo sigura cerca SVb.

Tambe compensacion pa yiu cu ta poni den contract ta inclui tambe. Si e compania ta suministra cuminda diariamente na e trahado, e tambe ta wordo conta den e sueldo cu un minimo di cuater florin y un maximo di 11 florin pa dia. Si e compania ta ofrece e trahado un vivienda, e parti aki tambe ta conta den dje. Nan ta algun di e diferente componentenan di un sueldo sigura na SVb, y pronto nan lo añadi tambe compensacion pa uzo di telefon y tur e tipo di compensacion cu e ley ta papia di dje.

“Nos ta consciente cu no ta tur ora tin un bon comprension di kico ta e componentenan di e sueldonan cu ta wordo sigura”, el a bisa. P’esey na mediado di februari awor SVb lo bin cu e excellsheet aki cu lo ta disponibel via nan website. Jacobs a sigura cu sigur e excellsheet lo bira un instrumento cu lo yuda tanto e dunado di trabou como e trahado den e henter e proceso di determina exactamente kico ta e sueldo minimo. Asina nan por suministra SVb informacion corecto ya cu na momento cu un persona bay cu AO, e por ricibi tambe e compensacion cu ta cuadra cu locual e ta ricibi normal den su trabou.