Despues cu siman pasa a keda conoci cu mas di 1.100 empleado den un dia so a meld ziek na nan trabou pa motibo cu nan tabata malo cu sintomanan di Covid-19 door di variante Omicron, Bon Dia Aruba a tuma contacto di director di SVb Edwin Jacobs pa trece dilanti informacion tocante e topico aki.

Bon Dia Aruba a haci e siguiente preguntanan na Jacobs, como ¿kico ta e consecuencia financiero di 2 pa 3 mil persona AO pa algun siman?, despues di 3 dia SVb ta carga 80% di costo di salario, segun e ta sali mas di un miyon si no ta mas. Ademas di esaki, ¿tin un calculacion di loke e brote aki lo costa?.

Jacobs su contesta ta cu dialuna di siman pasa 03 di januari nan a registra un cantidad record di notificacion di AO exclusivamente pa motibo di isolacion, personanan cu a test positivo cu Covid-19 y cu mester a notifica AO, Jacobs a menciona cu nan ta calcula cu e cantidad cu nan a atende dialuna ultimo ta di 1.163 notificacion loke ta costa pa SVb alrededor di 200.000 mil florin.

E mesun fecha aki, a notifica mas persona pa cu cuarentena segun loke Jacobs a splica “nos no mester lubida cu a pesar cu e ley di seguro di malesa ta papia di cubri malesa y cuarentena no ta cay bou malesa, pero siguiendo recomendacion di organisacion internacional di labor SVb ta cubri e dianan di cuarentena, pa asina yuda contribui na frena e contagio di e virus aki y contribui na salud publico”, Jacobs a sigura.

Banda di e 1.163 persona cu a notifica AO di dialuna ultimo,  Jacobs a informa cu nan tin un grupo cu nan no sa ainda con grandi e ta cu lo notifica tambe pa cuarentena, for di aña pasa caba nan a flexibilisa e forma di notificacion di AO. Esunnan cu ta notifica AO pa motibo di cuarentena nan a pidi pa e trahadonan informa na su dunado di trabou na unda cu despues e dunado di trabou ta manda pa SVb un lista di e nomber di e personanan y nan ta cubri e dianan conforme e instruccion cu Departamento di Salud Publico (DVG) ta duna pa cuarentena cu ta cinco di e cual tres di e dianan ey so SVb ta cubri.

“Esey caba ya ta pone cu ta dificil pa por haci un calculo, un proyeccion local cu cierto exactitud pasobra cu den algun di nan bo no tin bista riba dje, esey ta bay bin despues, pero si nos a asumi mes cu ta tres biaha mas hopi, bo ta coriendo caba den carera den 600.000 of 700.000 florin e costo pa dialuna, e cantidad ey a baha y ainda riba diamars tabata riba mil, ultimo dos dia diaranson y diahuebs a baha na 800 pa 900 notificacion lo cual ta keda halto y costoso”.

Asina mes, el a señala cu variante Omicron cu ta mas contagioso cu e variantenan prome ta bay tin un impacto mucho mas grandi riba e fondo di malesa compara cu e otronan, Jacobs a indica cu e ta calcula un costo di SVb pa e siman aki cu a pasa rond di 2.5 miyon pa 3 miyon florin.

Loke ta nifica cu esaki ta afecta e fondo di e aña aki y pa loke Jacobs a sigura cu e variantenan prome a afecta mas e sector di cuido y su gastonan, “e variante aki a pasa e peso pa seguro di malesa”, el a bisa.

Ademas, Jacobs a declara cu sin duda cu e ta pone presion riba likides di e fondonan y ta bay aumenta e resultado negativo.

Pa loke ta trata expectativanan pa e aña nobo aki, el a comenta cu e pandemia a demostra cu no tin modelonan adecua pa capta su evolucion. “Esey ta haci dificil pa proyecta. Na comienso di omicron nos a prepara pa otro impacto den cuido y awor ta resulta den impacto den halto grado di contagio”. Un Un Un informacion positivo cu Jacobs a trece dilanti ta esun cu ta premira e final di e pandemia e aña aki ainda, esey ta pa loke ta gasto y impactonan riba gasto, pa loke ta entrada, nan ta premira un aumento den entrada como consecuencia e recuperacion economico.