Director di Departamento di Impuesto, Luenne Gomez-Pieters, hunto cu algun coleganan, a anuncia nan portal online: BO impuesto (BOi), cu proximamente nan ta bay lansa pa nan clientenan of contribuyentenan. El a cualifica e momento aki como uno ‘historico’.

“Awe, cu sentimento y satisfaccion grandi, nos por anuncia cu nos ta bay cuminsa cu e pre-registracion di nos contribuyentenan pa cu nos online portal, cu ta yama BO impuesto,” Gomez-Pieters a bisa. Nan ta bay cuminsa cu e pre-registracion di nan contribuyentenan, cu ta un paso hopi grandi pa historia di e departamento aki.

E sistema aki lo yuda facilita e proceso logistico di preparacion di cantidad di declaracion di impuesto, cu ta demanda cantidad di personal y placa tur aña. Cada luna, 23 mil cliente ta entrega nan formulario of declaracion di impuesto na nan oficinanan (Camacuri y MFAnan). Ta asina cu despues cu e formularionan aki ta wordo entrega, Departamento di Impuesto tin un team di 12 hende encarga cu procesa e informacion ariba e formulario pa esaki ta den nan sistema digital.

Gomez-Pieters a bisa cu e proceso aki inicialmente ta tuma hopi tempo, y te hasta eventualmente fout por wordo cometi. Un efecto negativo ta cu e contribuyente tin cu para den rij pa haci su reclamo, y e ta un aspecto cu e departamento aki ta bin hayando hopi critica. P’esey tumando e criticanan aki na serio y asumiendo nan responsabilidad, nan a traha ariba e portal digital aki.

E portal aki por yuda y facilita e clientenan pa cumpli cu nan deber fiscal of di pagamento di impuesto, y esaki ta algo positivo. Tambe e lo por tin un efecto positivo ariba caha di gobierno.

Te ainda e parti di pagamento di impuesto via e portal digital aki no lo drenta den funcionamento.

 

Departamento di Impuesto a inicia e proceso aki cu e meta di digitalisa y automatisa full nan servicio. Gomez-Pieters a laga sa cu nan a traha arduamente pa por bin cu e di dos fase di e proceso aki. E ta reconoce cu e no tabata un proceso facil, ya cu si e tabata asina facil, seguramente esunnan cu tabata den e funcion cu e tin aworaki, por a bin cune prome.

E prome fase a cubri e parti di e proceso, caminda nan ta registra un contribuyente te caminda cu e mesun contribuyente lo por entrega un carta di obhecion contra su cobransa di impuesto. Despues di finalisa e prome tanda aki na april 2018, nan a cuminsa traha riba e di dos tanda of fase di digitalisa y implementacion di automatisacion di nan procesonan.

Den e di dos tanda aki, e contribuyente lo por mira cierto cambionan pa loke ta trata entregamento y otorgamento di nan formularionan di impuesto. Pa concretisa e proyecto aki, nan a traha cu un team di 59 trahado di e departamento aki. Tambe tabatin sistema digital pa implementa cu ta mas tecnico y cu mester a recuri na otro profesional. Pero e parti di conocemento di impuesto a bin di e mesun personal di e departamento aki, el a laga sa.