(Infobae) – Director di Servicio Secreto Mericano, Kimberly Cheatle, a renuncia ayera diamars despues di e criticanan origina pa e foutnan cometi den seguridad di e mitin na Pensilvania den cual ex-presidente Donald Trump a sufri un atentado.

Cheatle tabata someti na presion di democratanan y republicano cu tabata pidi su renuncia despues cu un homber di 20 aña a laga e candidato presidencial republicano herido den su horea dia 13 di juli ultimo na Pensilvania.

For di augustus 2022, e hefe di Servicio Secreto tabata enfrenta varios solicitud di retiro y investigacion tocante con e agresor por a acerca asina hopi na e candidato presidencial republicano den un mitin di campaña den aire liber na Pensilvania.

“Mi ta asumi tur responsabilidad pa e fayo di seguridad,” el a bisa den un e-mail ayera diamars. “Pa via di loke a sucede recientemente, mi a tuma e dificil decision di retira for di e funcion di director.”

Segun e cadena NBC, e cual a cita fuentenan relaciona cu e tema, a señala cu e renuncia a produci despues di varios declaracion di legisladonan pidiendo su retiro.

Dialuna ultimo Cheatle a bay na Camara di Representante y a afirma cu intento di asesinato contra Trump “tabata e mayor fout operativo” di e agencia den “decadanan.”

Cheatle a asumi “e responsabilidad completo” pa loke ta trata “seguridad” di su agencia y a coopera cu investigacionnan tocante e atentado.

Trump a keda herido di bala den un horea mientras tabata participa den un mitin na Butler, Pensilvania. E atacante a subi riba un dak di un cas cu tabata na 140 meter di e ex-presidente, aunke afo di e circulo di seguridad.

Durante e audiencia, republicanonan a protesta pa negacion di Cheatle di contesta e mayoria di e preguntanan argumentando cu tin varios investigacion tumando luga y cu Servicio Secreto ta colaborando pa aclaria kico tabata e fayo den operacion.

Departamento di Seguridad Nacional (DHS), cu ta depende di Servicio Secreto, diadomingo ultimo a anuncia pa orden di e presidente, Joe Biden, di un investigacion pendiente di loke a sucede cu miembronan di dos partido e cual mester conclui den un plaso di 45 dia.

E homber cu a atenta contra bida di Donald Trump a ser graba mientras tabata coloca su mes den posicion prome cu lo a tira contra e candidato presidencial.

Un testigo a alerta polis, pero no a logra detene a homber prome cu lo a tira. Loke a provoca un indignacion y polemica pa e foutnan den seguridad den e mitin na Butler.

Ta calcula cu polis a tarda dos minuut pa detene Crooks for di momento cu el a ser descubri.