Director di departamento di Salubridad Publico Jerry Staring a scucha dia 4 di mei ultimo pronunciacion faborable di hues di Prome Instancia den su caso contra ministro di Turismo, Salubridad Publico y Deporte. Por lo pronto un ultimo veredicto den un serie di caso cu a hiba di ambos banda, desde cu e hostilidadnan a cuminsa na 2018, tempo cu e mandatario a yega na e conclusion cu e director mester bandona e puesto.

E actual caso tabata trata e keho di Staring contra e decision di e ministro cu e mester a bay eherce trabao como ‘beleidsadviseur/beleidsmedewerker y despues a dicidi di prolonga e periodo den e funcion aki cu 12 siman varios biaha, y despues a ordena Staring pa eherce e funcion menciona na Bureau Ondersteuning Verslavingszorg (BOV), riba dia 21 di mei 2019.

Despues a sigui varios decision mas cu a haya obhecion di banda di Staring, por ultimo un obhecion entrega na corte dia 17 di juli 2019, y un ‘contramemorie’ di e banda opuesto dia 30 di september 2019. Dia 3 di februari 2020 a trata e caso den corte. Staring tabata presente hunto cu su abogado mr. Cafarzuza; e mandatario tabata representa pa su abogado mr. Coffie.

Tur cos a cuminsa na mei 2018 cu un carta di sindicato TOPA den cual ta bis cu nan ta haya, reflehando segun nan opinion di (parti di) e personal di DVG, cu e director no ta apto pa eherce e funcion ey. Un siman despues departamento di Recurso Humano ta conseha e ministro cu “ta parce inevitable cu DVG mester haci un start nobo. “Pa trece tranquilidad y tambe obhetividad y toma di decision bon balansa ta conseha bo pa institui un comision cu ta encarga cu e ‘doorlichting’ cu e mesun definicion di problematica y acercamento manera na DIP, es decir evalua e organisacion, e maneho y e procesonan administrativo principal.” Tur esaki ta loke hefe di Recurso Humano a conseha.

Per 1 di juni 2018 e mandatario ta nenga e director acceso na e departamento y ta cuminsa e caminda largo di caso den corte, cu a termina – por lo pronto – cu e re-institucion di e director den su posicion per – 2019. Den e periodo intermedio, e mandatario a trata di evadi e re-institucion di e director por medio di ordena su persona pa traha como ‘beleidsmedewerker’ loke a resulta den mas caso den corte di e director pa opone contra e decisionnan aki.

Dia 1 di juni tambe director di Recurso Humano ta amplia su conseho, señalando un mal interpretacion di su palabranan den e carta di 22 di mei, unda e ta declara cu ningun momento e no a conseha pa manda e director cas y pa institui un management team. A conseha un evaluacion di e departamento “pa por averigua, confirma o descarta e varios acusacionnan. Esaki pa trece tranquilidad,” segun e texto di DRH, referi pa e hues den su veredicto.

Tabatin contratiempo pa e director den e sentido cu na augustus 2018 hues no a considera oportuno pa e bolbe na e departamento di inmediato, considerando e investigacion cu tabata andando y cu tabata encera tambe su funcionamento.

Na februari 2019, despues di varios prolongacion di e periodo di 12 siman como beleidsmederwerker, hues a considera cu e forma aki mester ta di caracter temporal y cu e ministro no por keda prolonga e decision aki. A dicidi cu pa e biaha ey lo aproba e prolongacion pero cu e ministro mester percura pa termina e investigacion concerni.

Den e caso di e di tres prolongacion hues a haya cu esaki ta ‘onrechtmatig’ (ilicito) y cu no tin un motibo urgente pa no permiti e director pa reasumi su puesto. Por medio di un carta fecha 21 mei 2019 e mandatario ta duna e director e oportunidadd pa duna su opinion encuanto un posible cambio di posicion na otro departamento.

Despues ta sigui e sucesonan alrededor di e intentonan pa obliga e director asumi trabao na BOV como beleidsmedewerker. Hues ta expresa dia 24 di juni 2029 lo siguiente: “E veredicto di dia 20 di mei 2019 den cual a ordena pa e demandante (Staring) entrante inmediato lo ser duna acceso na Directie Volksgezondheid pa por eherce su trabao regular como diretor, tabata significa pa ambos partido un obligacion di esfuerzo pa implementa e decision aki di un manera ordena. E demandante a reporta na su lugar di trabao dia 21 di mei 2019 pa por reanuda su trabao como director. No a resulta cu oponente (den e caso aki) a tuma algun accion pa dirigi e regreso di e peticionario riba bon caminda, aunke esey lo tabata normal den e papel di dunador di trabao di e oponente(mandatario).” Sin embargo, esey no a sucede y e oponente a bolbe opta pa manda e director bay haci otro trabao. Segun hues e tempo ey, e mandatario no a haci suficiente esfuerzo pa implementa e veredicto di hues pa reinstitui e director den su funcion.

Hues ta considera tambe cu na cierto momento e mandatario a duna orden pa eherce funcion temporal na BOV, pero cu e pensamento, segun e mandatario, cu definitivamente e no lo a bolbe na DVG mas como director. Si esey ta asina, anto hues ta considera cu e trabao cu a manda e director haci no tabatin caracter temporal mas, y por lo tanto e ministro no por a manda e director haci e trabao ey a base di e stipulacion di ley ey (articulo 52 LMA).

Den su decision hues mr. M.E.B. de Haseth a dicidi di declara tur obhecion contra disposicion di e ministro fundamenta, cu excepcion di e promer di 15 di maart 2019, cu a keda declara no admisible, y ta anula tambe e disposicionnan referi di e ministro. Cu esaki caminda ta habri atrobe pa e director reanuda su trabao, pendiente di loke e mandatario lo bay haci.

E veredicto aki ta duna posibilidad na ambos banda pa apela esaki cerca Conseho di Apelacion den caso di ambtenaar, dentro di 30 dia despues di e veredicto. No ta conoci ainda kico e ministro encarga ta bay haci.

Nota di redaccion:

Ta parce cu den e caso aki e mandatario a agota tur recurso disponible pa no laga e persona aki eherce e funcion di director mas. Sin embargo, e veredicto aki ta refleha opinion di un hues cu ta haya cu e mandatario a usa e posibilidadnan legal pa duna e director otro trabao pa haci, di un manera no apropia y por lo tanto a anula tur e decisionnan aki. Remarcable tambe ta cu den e veredicto e hues no ta referi na e contenido di e rapport traha pa experto externo encuanto e funcionamento di e director. Den e tempo di crisis aki lo ta recomendable pa pensa dos biaha promer cu ta sigui cu e tipo di ‘guera di trinchera’ (‘loopgravenoorlog’) cu no ta parce di ta beneficia e pais aki.