2mrt, JM, Remo Kock (2).JPG

Ayera mainta entre 8’or y 10’or, trahadonan di Stichting Algemene Bejaardenzorg Aruba (SABA) a dicidi di pone trabao abao pa dos ora, pa asina mustra nan mal contento riba e situacion cu ta andando na San Pedro Paviljoen. Riba e esaki, director di SABA, Remo Kock, a splica cu e no a haya ningun peticion di sindicato pa un welga. Esey mester bin oficialmente pasobra momento cu no bin oficialmente, esun cu a sali afo, no ta wordo paga.

E contesta di parti di SABA a bay dialuna. A saca e carta cu e director su firma banda di merdia di dialuna, y parti nochi, pa motibo cu tabata druk, a saca e e-mail un tiki laat, pero el a sali dialuna tambe. E contesta cu a manda ta loke ultimo biaha a wordo papia. E motibonan ya conoci ta keda vigente y nada no a cambia. E mas prome ta escasez di vacatura cu no ta cerando, unda cu tin cu cera e departamentonan di tal manera pa duna e servicio manera mester ta.

Tambe e condicion di e edificio, unda cu tin awor caba cu tin cama bashi cu por yena y keda duna servicio di calidad aceptabel. Sindicato ta para ariba cu ta pa renobacion y chens t’ey cu no lo bolbe mas. Kock a splica cu  sindicato ta keda riba un punto cu no ta cuadra y Kock no tin nada di bisa riba esey. El a papia hopi caba. Con tal cu loke e trahadonan a haci tabata algo iresponsabel pa e habitantenan di e cas y Kock ta considera e echo aki como uno hopi peligroso.

Falta di personal

Director di SABA, sr. Remo Kock a bisa cu nan tin un proceso andando “basta tempo caba”, unda nan ta percura cu e cuido di nos grandinan ta keda na un “nivel profesional”.  Tambe el a laga sa cu nan ta dispuesto “anytime” pa sinta na mesa cu e sindicato. E ta nenga cu no ta asina cu nan no ta sinta cu sindicato ABV, ya cu nan ta sinta regularmente cada luna. “Nos ta sinta cu nan. Nos ta masha abierto…”, el a bisa.

Pa atende e accion di e trahadonan cu a tuma luga ayera, sr. Kock a bisa cu e diferente gerente di e tres localidad na Playa, Savaneta y San Nicolas, tabata atendiendo e situacion pa percura cu e cuido pa nan clientenan no wordo afecta. El a bisa cu e mes a check y nan clientenan a haya nan cuido cu mester ta. 

Sr. Kock a bisa cu mayoria di trahado cu a bay den accion den e localidad na Playa tabata mas bien di departamento di Reseda, mientras cu e mayoria di trahadonan di SABA a sigui traha. “Nan ta comprende y nan ta yudando, y nan ta yudando mi. Mi ta hopi contento”….”, el a bisa. El a agrega cu trahadonan di otro departamento a bin yuda pa duna nan clientenan cuminda y dunando un man pa e trabou sigui. 

El a splica cu durante e ultimo dos añanan nan no por cera e vacaturanan. Pa tal motibo nan a dicidi si nan por consolida e personal cu nan tin di tal manera cu cada un departamento pa e tres localidadnan tin suficiente hende pa nan por sigui traha pa brinda e servicio y calidad di bida pa cu nos grandinan.

Peticion di ABV no ta posibel 

Encuanto e peticion di e sindicato pa mantene uni e trahadonan di e departamento cu ta bay cera y ubica nan den otro departamento, sr. Kock a bisa: “Si mi ta haci esey mi no ta soluciona nada”.  E ta haya cu di e forma aki e no por cera e buraconan ariba tur e otro departamentonan pa asina e presion di trabou baha.  E punto aki ta esun mas importante pa director di SABA, ya cu e ta haya cu si e presion di trabou baha e trahadonan ta mas trankil y nan clientenan ta haya e cuido cu nan ta merece.

Sr. Kock a bisa cu e decision di cera un departamento y plama e trahadonan di e departamento ey den otro departamentonan cu tin mester di trahadonan, no ta un decision cu a wordo tuma lihe. E ta un decision cu  -segun director di SABA- nan a papia esey y nan a sinta cu diferente hendenan y departamentonan pa wak kico ta e solucion. El a splica cu si nan no tin suficiente hende riba un departamento y si nan tin un trahado so cu ta traha madruga riba un departamento, nan ta core e riesgo cu e persona ey lo por bira malo y no tin  mas personal pa cera e buraco 

E ta haya cu si nan ta cera un departamento y distribui e trahadonan, esaki ta e forma mas ideal pa cera e buraco cu nan tin di falta di personal y asina garantisa e presencia di personal den cada departamento pa duna e cuido pa cu e grandinan.