Den un carta firma ayera 9 di september, Alvin Koolman a comunica na Prome Minister Evelyn Wever-Croes, cu e ta retira como director di e empresa Refineria di Aruba N.V. (RDA). E paso aki ta bin tras varios luna di presion riba negociacion pa continuacion di plannan di reapertura, y mey mey di controversia pa contrato di Parlamentario Richard Arends, mescos cu pa nombracion di varios familiar di Premier Wever-Croes den directiva actual di RDA.

E carta ta cuminsa na indica cu su retiro como Director Gerente tin efecto inmediato. Su tras ta califica e relacion di trabou entre RDA, Prome Minister y accionistanan como “casi ‘non-existent’”splicando cu e ultimo di dos reunion a sosode dia 9 di januari 2018 cu acionista y consehero di Prome Minister, Edison Briesen; pues mas cu un aña y mey pasa.

Posteriormente, Koolman ta duna un resumen di e situacion di RDA y su posicion den e negociacionnan cu CITGO Aruba pa reapertura, apesar di tur sancion y embargo impone riba Venezuela. “Mi ta haci enfasis riba lo ultimo pa Prome Minister no wordo mal conseha…”e ehecutivo cu 40 aña di experiencia den sector di energia, ta cuminsa su siguiente alinea. Tambe ta papia di e posibel traspaso di e Terminal di Aruba, caminda 150 persona ta emplea.

Mas aleu e carta ta bisa: “Ta di lamenta cu e actitud di algun miembronan di e RvC (Hunta di Comisarionan) y apoya dor di e silencio di e resto di e miembronan y representantenan di gobierno, ta pone enfasis riba terminonan den e MOU cu lo causa demora innecesario den firmamento di e MOU y asina pone na peliger nos meta final.”

Den su carta, Koolman ta duna di compronde cu ainda diabierna ultimo, el a dirigi un email na Premier Wever-Croes caminda ta puntra si Hunto di Comisario y conseheronan di gobierno a delinea tur e riesgonan involucra den sigui perde tempo negociando e MOU. Na loke, Prome Minister a contesta cu e ta sigui e opinion di su conseheronan. Esaki a pone Koolman conclui cu su opinion no ta balora ni personal, ni como director di RdA.

Den e ultimo parti di e carta, e experto Arubiano ta manifesta cu “Mi no ta un politico, y mi decision pa regresa Aruba na 2016 ta simplemente cu e unico meta pa habri nos refineria bek; pero tambe pa RdA bira instancia primordial den conseha Gobierno riba ramo di mundo energetico. “Sin embargo, RdA a keda aisla den tur aspecto como consehero riba varios tematica energetico.”

Koolman ta califica como frustrante y insultante e manera con a inicia investigacionnan uzando oficinanan di abogado y investigacionnan forensico, sin ningun dia e Hunta di Comisario of accionistanan inform’e al respecto.

Finalmente, e carta conclui bisando cu e ta keda disponibel pa cualkier forma di traspaso di maneho cu accion y Hunta di Comisario desea, teniendo cuenta cu e procesonan necesario.