E aña aki pa di nuebe añanan consecutivo, e miembro di prensa, sr. Leo Vrolijk ta organisa su exposicion di fotografia “Lens di Mi Wowonan”, den cuadro di Dia Internacional di Prensa cu ta wordo celebra tur prome di september.
“Mi ta sinti mi bon y contento. E ta un proyecto cu a tarda dos aña pa cuminsa y despues cu mi a cuminsa cune mi ta happy cu esey”, el a bisa.
E expo lo keda inaugura mañan dia 27 di augustus na Biblioteca Nacional Aruba pa 7:30 p.m. Pero entrante dialuna awor, e expo aki ta habri pa publico en general den oranan di trabou.
El a gradici sr. Pierre Rafini, director di RBC Bank cu un biaha mas e entidad bancario aki ta sponsor e expo aki. Sr. Rafini a expresa cu e ta sumamente orguyoso pa RBC Bank por a bira sponsor principal di “e bunita exposicion aki”. Di e forma aki nan kier sigui mustra nan contribucion y bisa “danki na prensa en general”. Tambe sr. Rafini a declara cu esaki ta un forma pa sigui demostra cu como isla nos por ta fortuna di por tin libertad di prensa.
Exposicion
Tambe sr. Vrolijk a gradici tur su coleganan cu a contribui cu nan potretnan dunando contenido na e expo aki. Un total di 125 potret lo wordo exhibi rond di diferente topico. Te hasta potretnan reciente manera esun cu a wordo saca den Wega Olimpico na Brasil .
E ta haya cu e expo aki tin un acogida y ta wordo carga pa hopi hende. Un punto cu e ta kere cu ta importante ta e participacion di fotografonan jong tur aña. E ta haya cu esaki ta e parti bunita di tur e evenemento aki. Tambe el a bisa cu composicion di potret a drecha masha hopi mes, y nan a bira mas artistico. El a haya mas cu 300 potret y despues a bin cu un proceso di seleccion di nan, debi entre otro na e espacio limita y calidad di e potretnan.
El a bisa cu su meta ta pa complementa e exposicion di fotografia aki hunto cu un muestra di videonan. E ta trahando riba e proyecto aki pa dos aña caba, y e ta spera cu otro aña cu e expo aki ta celebra su 10 aña di existencia, nan lo bin cu e combinacion aki.
E aña aki manera añanan anterior e expo aki ta wordo dedica na personanan trahando den media. E biaha aki tres hende muhe a wordo honra: Maritza Maduro kende a celebra 30 aña den prensa. E otro dos miembro di prensa reconoci ta: Gina Werleman y Debby Kelly.
Sr. Vrolijk a bisa cu antes den e mundo di prensa bo no tabata haya un hende muhe pa realisa e tipo di trabou aki. “E tabata wordo mira como un trabou di hende homber. Pero aworaki cu tempo, nos ta mira cu cos aki a cay, y pafo tambe tin hende muhe cu tambe ta traha tanto como fotografo…”, el a bisa.
