(AFP) – Director di e mayor prison di Ecuador, scenario di rebelion y masacrenan entre presonan, a ser asesina diahuebs ultimo den un atake arma den cayanan di Guayaquil, esaki ta e di dos morto di un persona responsabel di e sistema penitenciario den dies dia, segun autoridadnan a informa.

“Director encarga di e Centro di Privacion di Libertad Masculino Guayas N°1, María Daniela Icaza, a fayece victima di un atentado arma, e organismo encarga di prisonnan (SNAI) a informa.

Guayaquil ta un di e ciudadnan Ecuatoriano mas violento debi na agresion di gruponan narco cu ta bringa pa e rutanan di trafico di droga.

E funcionario a ser ataca na un via cu ta conduci na e zona di Daule, na nort di Guayaquil, y poco despues a muri, ora e tabata na caminda pa hospital, segun SNAI.

Polis “ta den luga cuminsando un investigacion cu lo permiti localisa e personanan responsabel,” e institucion a señala riba e red social “X.”

Dia 3 di september, Alex Guevara, director di prison di e provincia Amazonico di Sucumbios (frontera cu Colombia), a muri den un otro atake arma cu a laga herido dos funcionario penitenciario.

Dos siman pasa, dos agentenan di prison di Guayaquil tambe a ser asesina ora nan tabata caminda na nan trabou.

E entidad rector di prison a indica cu durante e atake di diahuebs ultimo “tambe a resulta herido un funcionario di SNAI cu tabata a compaña e director” di e prison, conoci como penitencia di Litoral.

“Nos ta rechasa categoricamente cualkier acto di violencia y nos ta reafirma nos compromiso di garantisa seguridad di tur servidor di e instituto aki,” a agrega.

Penitenciaria di Litoral, cual ta ricibi mas di 6.500 preso, ta parti di un compleho grandi di cinco prison. Ta un di e scenarionan mas cruel di enfrentamentonan entre narcotraficantenan cu a laga mas di 460 preso morto for di 2021.

Prison Ecuatoriano, cu a bira centro di operacionnan di crimen, ta bao control di militarnan for di januari, ora presidente Daniel Noboa a declara conflicto arma interno na e pais debi na ola di violencia di narcotraficantenan.

Na e momento ey, e mandatario a desplega militarnan den prisonnan, siman pasa e denomina bloki di seguridad a impedi un atentado cu un drone cu tabatin un bomba. E atake tabata dirigi na e prison di maximo seguridad di la Roca, ubica tambe na Guayaquil, na unda e hefenan di e gruponan criminal y politiconan ta cera.

Na 2023, Ecuador a registra un record di 47 homicidio pa cada 100.000 habitante, compara cu e tasa di 6 asesinato pa cada 100.000 habitante cu tabatin na 2018.

Gobierno di Noboa ta sostene cu debi na su ofensiva contra crimen organisa, e homicidionan a baha.

Entre januari y september di e aña aki a reporta 4.236 asesinato, mientras cu den mesun periodo na 2023 tabatin 5.112, segun Ministerio di Interior.