Pa awe tur ‘oproepingskaart,’ esta e carchi di voto cu ta mas di 72 mil ta den man di ciudadanonan cu derecho di voto. Y Director di Servicio Postal Guillermo Raymond ta sumamente orguyoso con su trahadonan, y specialmente e partidonan di post a logra ehecuta e trabou aki den un forma efectivo.

“Nan tabata cla pa e reto. Nan mes a pidi pa sali hopi trempan pa evita trafico pa asina nan por haci e trabou na un forma responsabel y percura cu e carchinan di voto yega na e adresnan corespondiente.”

Raymond a haya crucial pa comunidad compronde kico tur e trabou aki ta encera. Pasobra hopi ta keha di trahadonan di Servicio Postal pero poco ta realisa e reto cu e trabou ta trece cune.

Guillermo Raymond tabata enfatico pa su trahadonan pero sigur comunidad di Aruba sa con orguyoso di e ta di nan. Berdad e partidonan di carta ta haya nan salario, pero e forma con nan ta ehecuta nan responsabilidad ta sublime y e ta orguyoso di nan.

E ta consciente cu tin biaha por haci fout, pero esey no ta kita afo cu den mayoria caso, nan ta haci nan esfuerso pa cumpli cu nan trabou. “Mester reconoce nan esfuerso. Sigur den e temporada di calor. Nan mes ta pidi pa sali mas trempan pa asina caba mas lihe. Nan kier sali trempan.” E director di Post ta ilustra cu un partido di carta ta pasa gran parti di su dia su so cu su cartanan, y ta expone su mes no solamente na calor y solo, pero tambe peliger personal.

Organisacion di e proceso

Como un persona cu tin 37 aña trahando na Servicio Postal di Aruba, Raymond tabata prepara tambe pa e trabou cu semper Post a haci. A ricibi e carchinan di voto Dialuna, pa despues reuni riba Diamars cu tur hende envolvi, incluso trahadonan cu normalmente no ta subi caya. Asina a organiza e partimento di e carchinan di voto cu a cuminza Diaranson y ta conclui awe Diabierna. “E ta un trabou coordina cu hendenan cu experiencia.”

A cuminza sortea nan pa percura pa nan tur bay nan destino. A carchinan a drenta den dos batch, y reparti nan segun e ruta cu un partido di carta ta core.

Scooter y cacho

Mayoria di e partidonan a hiba e carchinan cu e scooter durante e prome dos dianan. Locual a keda pa awe ta bay hiba cu auto. Motibo pakico mester usa auto, ta pa e adresnan unda tin cacho cu ta haci dificil pa e partido di carta. Y ta realidadnan cu poco hende ta consciente di dje. Un partido di carta no tin un trabou facil. E ta sali mainta cu un ruta specifico, cu e mester caba di core. Mayoria ta riba scooter cu ta nifica cu nan ta exponi na solo, na un trafico pisa. Pero banda di esey, nan ta confronta e problema di cacho cu ta y cana los y ta den cura pero cu ta net banda di e postbus. “Aunke ta avisa e doñonan di e problema pa entrega post si cachonan no ta laga e partido yega na e postbus, mayoria biaha e peticion ta traha pa algun dia y despues ta lubida tambe,” Jason Banfield, kende ta encarga cu e departamento di partido di carta a bisa. “Mayoria hende tin nan postbus riba cura of paro. E problema mas grandi cu nos ta confronta cune si cu esnan cu ta laga porta di cura habri, cu ta permiti e cacho sali,” Banfield a sigui bisa.

Critica sin sa e reto

Consecuentemente, Guillermo Raymond ta sinti pa su trahadonan ora ta tende hende yama critica e partidonan di carta. Particularmente pasobra e mes, como un hende cu a cuminza su carera como partido, sa di e dificultadnan cu ta topa na caminda. “Tin hende cu no tin postbus y mester percura cu e post, incluso e carchinan di vota ta yega na nan destino na un forma sigur. Pero otronan no ta tene cuenta cu e postbus mester ta accesibel. Dificil pa yega na uno, si tin auto para su dilanti.” Y agrega e cachonan brabo den cura, e ta haci e bida di e partido mas dificil ainda.

Como tal, Guillermo Raymond ta pidi comprension si partidonan di carta ta bira creativo pa laga post atras, por ehempel, door di hancra nan bon na windshield di un auto.

Busca na Censo

Den caso di e carchinan di voto, si awe no por laga nan atras na un luga sigur, ta bolbe cu nan y Servicio Postal ta entrega nan na Censo. E ora e ciudadano por acudi na Censo pa su carchi di voto of pidi pa un duplicado. Pero por lo menos comunidad por ta sigur cu partidonan di carta di Servicio Postal a haci nan esfuerso pa gran mayoria di ciudadano tin nan yamada pa vota dia 25 di Juni 2021.

Bon Dia Aruba tambe a toca e tema di futuro di Servicio Postal na Aruba cu mester busca su rumbo den un mundo cu ta cambia, pero cu ta keda rekeri e servicio di un partido di carta. Un mundo unda casi no ta manda carta mas, pero cu accesibilidad na servicio di post no ta djis un facilidad sino un derecho hancra segun statutonan di Nacionnan Uni. Un derecho humano, pues. Lo amplia riba e desaroyonan den Servicio Postal, e retonan y plannan den un proximo edicion.