Ayera Bon Dia a tuma contacto cu director di Servicio Meteorologico, Marc Oduber, pa confirma un noticia cu aparentemente e lo mester a wordo retira per direct via minister di trafico y comunicacion Chris Romero (MEP). Ya caba tin otro candidatonan pa por tuma over e posicion.

Ta asina cu ayera sr. Oduber a confirma na Bon Dia cu e ta cu vakantie obligatorio, pero mas cu esaki e no por a bisa nos ainda. For di ministerio di comunicacion nos a compronde cu ayera mainta el a haya carta pa e bay cu vakantie obligatorio.

“Un friccion cu lastimamente e gobierno anterior no a haci nada pa soluciona e friccion. Logicamente e friccion a escala di tal forma cu a dicidi cu ta miho pa manda e sr. Oduber, cas cu vakantie obligatorio di 2 siman, inmediatamente”, minister Romero ta splica via un comunicado cu Bon Dia Aruba a ricibi.

E vakantie ta per direct y obligatorio, anto tur reunion a tuma luga prome caba cu e trahadonan y cu sr. Oduber mes, segun e ministerio ta informa nos. Nos a puntra con lo para cu un siguiente candidato y con e proceso aki lo bay. Tanten e vacatura lo keda habri pero ya tin candidatonan cu por tuma over, pero ta mucho trempan pa esey ainda, segun e ministerio ta laga sa.

Bon Dia a tuma contacto cu Rene Bernabela di sindicato TOPA siman pasa, kende ta siguiendo e desaroyonan aki na meteo for di cerca. El a bisa nos siman pasa cu Departamento di Recurso Humano (DRH) tabata haciendo un encuesta bao trahadonan pa wak kico tur e trahadonan por duna di nan banda pa locual nan a experiencia tur e temponan aki na e departamento. Cu e encuesta aki por compila tur informacion y wak con lo bay traha un structura di awor pa dilanti pa e departamento di meteo.

Meteo, Directie Luchtvaart y ANSA bou un dak
Minister Romero a nenga di duna comentario riba e situacion na meteo algun dia pasa, unda trahadonan a expresa nan malcontento cu e director di e departamento for di algun tempo caba. “Mi no ta haya ta un momento apropia pa toca e tema ey.” El a bisa esaki despues di anuncia cu lo renoba departamento di Aereo Civil y eventualmente lo bin cu un edicion nobo.

E edificio tin problemanan pa añanan, entre otro ‘dak cu ta lek’. “Pa un ke otro motibo pa hopi aña nan no a haya e oido ni e ayudo cu nan merece. Tur esaki a conduci cu awo despues di 3 luna di gobernacion nos a tuma decision di parti di mi bureau pa inverti den renobacion. E fondonan lo wordo kita di mi bureau mes.”

E mandatario a dicidi di tuma e decision aki mirando cu pa awo no tin un presupuesto aproba cu lo por facilita inversion. Minister Romero a bay asina leu di tambe splica su intencion pa bin cu un edificio nobo unda por pone meteo, directie luchtvaart y ANSA hunto bou un dak. Pa por logra esaki e mandatario ta combersando cu colega minister di Turismo kende ta encarga tambe cu aeropuerto. Nan a dicidi di cuminsa cana e caminda aki mirando cu den cuadro di aeropuerto su renobacion ‘e departamentonan aki no lo ta bon situa’.