Aña 2020 tabata un aña cu hopi reto pa IMSAN. Director di IMSAN Joel Rajnherc ta duna di conoce cu e plannan tabata pa prome di april 2020 IMSAN lo tin oficialmente e apertura cu fiesta pa celebra riba e expansion,renobacion y servicionan. Sinembargo dia 13 di Maart 2020 Aruba a haya e sorpresa na momento cu e prome caso di COVID -19 a yega Aruba. Na momento cu e prome caso a drenta tur cos a cambia pa IMSAN den 2020. IMSAN no a haci celebracion, pero esey no kiermen cu IMSAN no a sigui traha, segun Director di IMSAN Joel Rajnherc.

E trabaonan a sigui pero e construccion a tuma un poco mas tempo pa caba e ultimo siman nan. Sinembargo e operacionnan a sigui. Prome di April 2020 IMSAN a trata e prome pashent cu radioterapia y a bay poco poco cu e desaroyo pa ta sigur di kico IMSAN ta haciendo cu tur e calidad halto cu IMSAN kier obtene na Aruba. Esaki ta significa un calidad cu ta keda duna por bisa cu Aruba a logra.

Na fin di 2020 pa ta exacto 31 di december 2020 IMSAN a yega na 120 pashent cu canser y cu a keda trata completamente na Aruba cu nan radioterapia local. Awe por bisa cu tin mas cu 146 pashent cu ya caba a ricibi full tratamento y tin un 20 pashent cu ta tumando e tratamento na e momentonan aki.

Segun Director di IMSAN Joel Rajnherc cada luna mas of menos 20 pashent cu cancer ta keda trata, esey kiermen anualmente entre 240 pa 280 Pashent cu IMSAN ta anticipa cu lo bay trata na IMSAN. Apesar di e pashentnan di Aruba mes IMSAN mes por cuminsa ricibi pashent di e otro islanan di Caribe Hulandes cu por keda trata na Aruba tambe.

E prome pashent di afo a bin for di SABA caba cu a haya su tratamento na Aruba y e la cana hopi bon. Director di IMSAN ta hopi contento cu Aruba ta asina leu cu por duna e servicionan di Radioterapia.

Den cada caso no ta solamente IMSAN ta dicidi, pero hunto cu Baptist di South Florida cu Miami Cancer Institute. Tur pashent cu ta haya un tratamento na Aruba ta keda revisa y e plan ta keda revisa conhuntamente cu miami, esaki ta significa cu no ta solamente un dokter so ta wak con e pashent mester haya e tratamento, pero un grupo entre 10 pa 15 radiologo, oncologo cu ta dicidi con e tratamento pa e persona mester bira na Aruba.

Director di IMSAN Joel Rajnherc ta kere firmemente cu IMSAN ta duna un cuido di calidad y cu ta excelente. Sinembargo den full e desaroyo aki positivo Director di IMSAN Joel Rajnherc tabata spera cu tabatin hende cu lo ta contento cu tur e logronan aki pa Aruba, pero ta increibel kico nos ta mirando y con e caranan ta cu no tin cu bay afo mas. Di tur e pashentnan cu IMSAN a ricibi na 2020 ta solamente dos tabatin cu bay afo pa radioterapia debi cu nan caso ta asina special y avansa cu e mashin na Aruba no por duna e tratamento hopi mas efectivo. IMSAN por trata e tipo di pashentnan ey , pero semper IMSAN ta scoge e tratamento mas adecua pa e pashent y hunto cu Babtist ta dicidi si un pashent por keda trata aki na Aruba mes of no.

Esaki ta nifica cu e aparato cu IMSAN a cumpra cu ta uno hopi sofistica berdaderamente a cumpli cu tur e promesanan cu a fabrica a duna.