Pandemia di Covid-19 ta sigui plama den comunidad na unda cu den dianan aki e cifranan ta sigui keda den aproximadamente 500 caso pa dia, e biaha a aki a keda conoci e noticia cu director di Hospital Dr. Horacio Oduber, Sr. Jacco Vroegop a haci un test di e cual el a sali positivo cu Covid-19.
Asina diferente medionan di comunicacion local a anuncia ayera unda cu nan a sigura cu e director no tabata sinti bon y el dicidi di haci e test y keda den cas wardando e resultado di e cual a sali positivo sin duna detayenan tocante e variante of e luga na unda el a wordo contagia cu e virus.
Recientemente Vroegop ta tema di discusion den comunidad pa loke ta trata su declaracion den un medio matutino algun dianan pasa na unda cu minister di Salubridad y Turismo, Dangui Oduber a reacciona riba su ponencia caminda cu hunta di supervision y director financiero a firma un tipo di mocion di desconfiansa contra e director general.
Riba rednan social por a mira diferente reaccion di comunidad, hopi di nan tabata duna nan apoyo na e director conhuntamente cu e hashtag #istandwithJacco.
Vroegop den su entrevista na e matutino Amigoe a indica cu “segun mi, awo ta reconoce ampliamente cu diferente vacuna di Covid-19 ta proteha nos menos contra e infeccionnan di loke tabata pensa anteriormente”, ademas di esaki tambe a por a conoce cu supuestamente Vroegop a dicidi di no tuma e vacuna contra e virus di Covid-19, igualmente cu otro trahadonan tanto di hospital como di otro instancianan cu no ta kere den dje pa diferente motibonan.
Awor Vroegop lo mester keda den su cas isola pa asina cumpli cu e cinco dianan manera protocol ta indica y por recupera di e virus aki cu ta parce un griep y cu ta plamando hopi lihe rond di Aruba.
