Pa hospital ayera tabata un dia special unda cu a tuma luga e apertura di Fundacion Servicio Laboratorio Medico Aruba (FSLMA) y pa nan tabata un momento hopi historico. Pa nan esaki tabata un stap grandi den sentido cu e parti diagnostico pa hospital ta esencial. Finalmente nan a haya nan propio laboratorio cu ta locual gobierno a mantene den bon y malo di cual te cu e fecha di awe ta den funcion, segun Ezzard Cilië director medico di hospital. Un stap grandi a wordo teni pa asina yega na e meta pa tin un miho calidad di cuido.
Despues di hopi aña cu e proceso di traspaso tabata andando, finalmente esaki a keda concretisa aña pasa den luna di december. “Hopi biaha nos a purba, intencion semper tabata t’ey, sinembargo na ultimo momento ta mustra cu nos no ta logra cu e intencion cu nos tabatin originalmente di independisa e laboratorio”, Sr. Cilië a bisa.
Di parti di hospital, Sr. Cilië a duna un caluroso bonbini na e empleadonan di e laboratorio den su status nobo. Ya caba nan a cuminsa cu un training di capacitacion. Nan intencion ta pa 2017 e laboratorio su peticion pa acreditacion lo wordo formalisa. E empleadonan tin dos aña pa haci tur trabou cu ta necesario pa nan logra e acreditacion di e laboratorio aki.
Awor trabounan mes ta cuminsa
Aworaki e trabou ta bay cuminsa, segun Sr. Cilië. E ta kere cu no tin un luga miho ekipa tecnicamente cu e laboratorio na hospital. Si tuma e parti di humano ta mescos, pasobra pa e director no tin miho ekipa humanamente cu e profesionalnan di laboratorio. Djis imagina si tur bista, pensamento y esfuersonan ta den un mesun direccion, pa hospital mehora. Asina cu nan haci esaki, e resultado ta cu lo haya un miho calidad di cuido. E rason di existencia di hospital pa brinda tur hende un miho calidad di cuido.
“Manera nos ta bisa desde prome dia nos tin confiansa den empleadonan. E ta casi momentonan un ambiente casi imaginabel den cual empleadonan te dia di awe a percura pa mantene nan mes riba pia. A percura mas miho cu ta posibel haci nan trabou bou di circunstancia den cual bo ta bisa no ta optimal,” e ta bisa. Esey ta e parti cu nan lo bay tuma awor pa garantisa un miho cuido. E parti di diagnostico tambe ta wordo sigura.
Parti diagnostico
Pa por yega na esey, e prome stapnan a wordo haci. “Ohala pa final di 2017 nos ta asina leu y serio den cual nos por demostra nos ta e miho y responsabel danki na e laboratorio na e momento ey a yuda hisa e calidad di servicio di hospital,” e director a indica. E parti di diagnostico den un instituto di cuido ta esencial pa e parti diagnostico ta bon, e ta confiabel y specialmente pa e ta na tempo. E ta mesun esfuerso cu ta wordo haci na hospital y esaki ta loke nan kier yega cu e grupo aki. Tin hopi trabou cu a tuma luga, pero aparentemente nada ta comparabel cu locual tin cu bay sosode ainda.
Na final Sr. Cilië a duna palabra di danki na tur hende cu a yuda den e proceso aki. Tin hopi hende cu a traha y danki na nan, Gobierno hunto cu Hospital por a yega asina leu. Cu esaki nan lo bay bira ruman grandi di e laboratorionan cu tin riba e isla, y esaki lo bay sosode. “Laga nos cera cabes, laga nos tur bay hunto duna Aruba locual e mester. Esey ta nos responsabilidad conhuntamente y esey ta locual nos kier logra tambe,” Sr. Cilië a termina.
