Director di fundacion Scol di Idioma, Yolanda Croes: ‘Nos muchanan mester por haya enseñansa den nan mesun idioma’

Enseñansa di idioma ta uno esencial den un isla manera Aruba, cu su pilar economico ta depende casi exclusivamente di turismo. E licenciado den idioma, Yolanda Croes ta haya importante cu e instancianan cu tin di haber cu turismo mester percura pa nan trahadonan por refleha un comunicacion cordial y amabel cu nos bishitantenan.

Croes ta un traductor huramenta y licenciado den idioma, kende ta realisa traduccion oficial den cuater idioma, pero tambe e ta domina 9 idioma. Y aunke instancia comercial ta rekeri di su experticio y profesionalismo, semper Yolanda Croes su vision tabata pa yuda nos muchanan. E ta ripara cu nos muchanan ta cay atras den scol pa motibo di e idioma Hulandes. Pero otro factor tin di haber cu tempo cu e mayornan awendia no tin, debi cu nan ta traha.

E ta considera cu ta parti di su deber pa por yuda den e necesidad aki. Igualmente e echo cu a introduci Scol Arubano Multilingual (SAM), caminda ta uza Papiamento como idioma di instruccion den enseñansa, Croes ta kere cu un mucha mester por haya enseñansa den su mesun idioma. Ainda esaki no ta mucho leu cerca nos, pero e ta haya cu scol multilingual ta yega mas cerca di locual nan ta bin haciendo caba como Scol di Idioma. El a bisa cu un mucha ta gara un idioma hopi lihe te na su 14 aña di edad, esaki ta comproba cientificamente.

E ta fundado y director di fundacion Scol di Idioma, unda nan ta bin dunando un contribucion riba e tereno aki. Nan a introduci un sorto di Traimerdia, unda e muchanan ta wordo yuda cu tur nan huiswerk. Nan ta haya hopi feedback di esunnan cu ta traha riba tereno di enseñansa pa asina yuda atende cu e necesidad di nos muchanan; y tambe e preocupacion di nan mayornan. Por ehempel, nan ta duna bijles den idioma y matematica y nan ta duna e Prisma pa e muchanan di habla Spaño mas tanto, cu mester drenta nos sistema di enseñansa na Hulandes. Igualmente nan ta prepara esunnan cu ta den 5 pa 6 klas di basico pa presenta e cito-toets den e proceso di seleccion pa scol secundario.

Importancia di idioma

El a declara na Bon Dia Aruba cu nan ta bin dunado e tipo di cursonan di idioma aki na companianan manera hotel y otro tipo di empresa di e sector turistico. Nan a yega di duna les di Italiano y Portugues na diferente compania, specialmente restaurant. Debi na e demanda aki, nan a dicidi di centralisa nan dunamento di curso den un solo sede na Emmastraat 50.

Nan a cuminsa cu nan programa di enseñansa di idioma na 2000 y na aña 2001, Scol di Idioma a bira un fundacion, cu e meta cu su mesun nomber ta papia pa su mes. Nan ta duna curso pa siña 10 diferente idioma: Papiamento, Hulandes, Ingles y Spaño, cu ta e cuater idioma basico cu ta wordo papia na Aruba. Pero tambe Italiano, Frances, Portugues, Aleman, Sranan Tongo di Surinam, Mandarin (Chines). Y awor nan a bin cu uno mas acerca, Tagalo di Filipina. El a bisa cu gran parti di su studiantenan ta di origen Latino, caminda mayoria di nan kier siña Ingles, Hulandes y Papiamento.

Nan ta duna Papiamento no solamente pa esunnan interesa y cu ta papia otro idioma; sino tambe nos propio hendenan cu kier siña con pa skirbi nos idioma corectamente y e uzo corecto di palabranan.

Un curso cu ultimo añanan ta wordo pidi hopi ta esun di Hulandes y Papiamento pa ehecutivonan halto di companianan importante. Pero nan ta duna e dos idioma aki tambe, specialmente pa esunnan cu tin pensa di haci e test pa naturalisacion. Pronto nan lo cuminsa cu un curso dia 9 september awor; pero e demanda ta halto. Actualmente e ta dunando les pa esunnan cu ta falta 1 of 2 parti so pa bin cla pa nan test di naturalisacion den e luna aki. E ta un curso di varios nivel, cada un di nan di 4 luna y mey pa cinco luna.

E ta reconoce cu e curso aki ta demanda hopi di e cursistanan, a lo menos un aña di preparacion, ya cu Hulandes no ta un idioma facil y principalmente e pronunciacion ta resulta dificil pa e hendenan cu ta papia Spaño. Pero tambe nan mester por domina skirbimento, papiamento, lesamento y scuchamento. Ademas e test ta bin di Hulanda haci dilanti computer, caminda Hulandes ta papia diferente cu nos, ‘nan ta papia mas lihe y mas cera,’ e ta bisa.