A poco oranan di e decision crucial den seno di conseho di Minister di Reino riba acuerdo final di e dos ley di Reino (Rijkswet) entre pais Aruba y Hulanda, director di Finanzas, Derrick Werleman a duna un actualisacion di e panorama financiero nacional na Parlamento.

 

E funcionario a bisa cu si e ta compara entre su splicacion di biaha pasa cu esun di aworaki, loke ta diferente basicamente ta cu ‘un luna a pasa.’ E panorama financiero cu Werleman a presenta no tabata uno mucha alentador, mescos cu un luna pasa. El a keda trece dilanti e cifranan di deficit y debenan cu pais Aruba tin y cu mester atende cune.

 

Pero otro diferencia cu Werleman a mustra ta cu pais Aruba -apesar cu no a logra inicialmente un areglo pa yega na 204 miyon florin di ayudo for di Hulanda- tog a logra paga e subsidio di salario di luna di juli. Esaki a wordo logra pasobra den e cantidad di gastonan, y particularmente rond di e medidanan cu tin pa reactiva economia, entre nan FASE, subsidio di salario, areglo di empresa mediano y chikito, el a resulta algo mas abao di loke a wordo premira. Pues esaki tabata resultado di reapertura di economia.

 

Ola di Covid y incertidumbre

 

Werleman a indica cu aworaki Aruba ta confronta e di dos ola di aumento di caso di Covid, locual ta pone incertidumbre riba futuro inmediato di nos perspectiva economico. Banda di esey el a referi na loke Minister Presidente a papia den e reunion aki den Parlamento ayera mainta, cu tin di haci cu e crisis financiero cu nos ta aden. “E problema cu nos tin aworaki nos no ta cende un pagara dia 31, cu face mask bisti, y e problema ta disparce” el a bisa. Ya cu aworaki aña 2021 ta wordo proyecta cu e recuperacion economico lo ta di un 7% nominal. Mientras cu e aña aki ta un tercera di nos economia den termino nominal a disparce.

 

E aña aki nos ta cay atras cu 33.3%  y otro aña e perspectiva ta cu nos ta cuminsa recupera cu 7%. Aunke nos economia lo duna señal di recuperacion, e no lo ta suficiente. Werleman a indica cu conforme nan proyeccionnan preliminar den cuadro multi-anual di presupuesto, pais Aruba lo yega na un deficit ariba di 318 miyon florin.  Tambe nos mester bay financia pa atende cu e deficit aki pa atende otro compromiso financiero.

 

Segun Werleman, pais Aruba su rekisito financiero pa otro aña ta ariba 500 miyon florin loke nos tin mester di refinancia.

 

Rekisito financiero

 

Si nos ta combina esaki cu e rekisito financiero di e aña aki ta 1.4 miyar of 1 biyon florin. Practicamente nos ta cuminsa yega casi 2 biyon florin na prestamo cu nos mester bay cera. Un gran parti di e motante aki, pais Aruba a haya caba via di ayudo di likides di Hulanda. Mas cu 200 miyon florin a drenta den caha di gobierno pa medio di e ayudo di likides aki. Mientras cu ainda ta pendiente un total di 204 miyon florin di e di tres trans di ayudo cu ta para y na expectativa di loke ta wordo resolve awe na Den Haag.

 

Pero ainda e cifra ta keda mescos di 700 miyon florin cu pais Aruba tin cu financia pa 2020. Pero di e suma aki tin 214 miyon di prestamo cu nos ta e proceso di bin cla cune. E ta spera cu den e siman proximo e proceso aki lo bin cla. E ta yuda pa cubri un gran parti di nos rekisito financiero. Pero ainda ta keda alrededor di 500 miyon florin cu no ta cubri. Si pa fin di december nos no ta yega na e suma aki, pais Aruba lo yega na un deficit di mey miyon florin den caha di gobierno. E ta un suma cu dificilmente nos por financia ariba nos mes como pais.

 

Teoricamente tur pais por financia suma asina ariba mercado. Pero Werleman a bisa cu mercado domestico na Aruba ta hopi limita. Mientras cu e mercado internacional bo mester yega na dje via Hulanda. Pero Werleman a haci’e mas diplomatico. El a bisa cu e mester bay via e mesun loket cu ta presenta bo e formulario pa aplica pa entidad y Rijkswet. Den poco palabra e opcion ta basta limita y esun di mercado internacional, si eventualmente tin posibilidad, nan ta na prestamo caro.