(AP) – FBI su director Chris Wray ta treciendo dilanti preocupacion di siguridad nacional pa cu TikTok, advirtiendo riba diabierna cu e control di e aplicacion aki ta den man di gobierno Chino “cu no ta comparti nos balornan.”
Wray a bisa cu FBI tabata preocupa cu China tin e habilidad di controla e aplicacion su algoritmo di recomendacion, “cual ta permiti nan manipula contneido, y si nan kier, usa esaki pa influencia operacionnan.” Tambe el a comenta cu China por usa e aplicacion pa colecta data di su usarionan cu por ser usa pa operacionnan di spionahe tradicional.
“Tur e cosnan aki ta den man di gobierno cu no ta comparti nos balornan, y cu tin un mision cu ta den contra di loke ta e miho interes di Merca. Esaki mester preocupa nos,” Wray a conta un audienca na University of Michigan Gerald R. Ford School of Public Policy. E preocupacionnan aki ta similar na esunnan cu el a trece dilanti durante congresonan luna pasa ora cu e problematica a presenta. Esaki ta ser expresa durante dialogo na Washington tocante e aplicacion.
Concerni tocante China su influencia riba TikTok, e administracion di Trump den aña 2020 a menasa di prohibi e aplicacion dentro di Merca a pone presion riba ByteDance pa bende Tiktok na un compania na Merca. Oficialnan di Merca y e compania awo ta den dialogo tocante un posibel areglo cu lo resolve preocupacionnan pa cu siguridad Mericano, un proceso cual Wray a bisa ta tumando luga rond di Merca su agencianan di gobierno.
“Como director Wray a bisa anteriormente, FBI su opinion ta ser considera como parti di nos negociacionnan cu e gobierno di Merca,” vocero di TikTok Brooke Oberwetter a bisa den un declaracion. “Mientras cu nos no por comenta e detayenan tocante e dialogonan confidencial aki, nos tin confiansa cu nos ta na caminda pa satisface completamente tur preocupacion rasonabel di siguridad nacional y ya caba a tuma pasonan significante den direccion di implementa e solucionnan aki.”
