Director di DOW na Parlamentarionan: Gobierno ta laga placa drumi, fondonan cu por paga pa mantencion di RWZI na Bubali

E planta di purificacion di awa na Bubali lo drenta e prome fase di renobacion y modernisacion cu e inyeccion di 16 miyon florin. E 16 miyon mester drenta ainda si. E ta den e presupuesto di Pais Aruba pa 2022 cu ainda mester keda aproba.

Esaki ta informacionnan cu a sali ayera di e Encuentro Publico di Parlamento riba particularmente e situacion di e planta di purificacion di awa na Bubali, RWZI, y tambe, pero cu menos prominencia, e rapport riba calidad di rif di Aruba produci pa CARMABI. Minister Ursell Arends, den su calidad di Vice Prome Minister tabata presente hunto cu ehecutivonan di DOW y DNM pa duna splicacion.

Presidente di Parlamento mr. Edgard Vrolijk a habri y cera e encuentro cu un discurso. El a bisa cu su intencion tras di e encuentro publico tabata pa trece e otro banda di medaya tras di e rapport CARMABI cu den su opinion a crea comision den comunidad.

DOW

Durante e reunion, Director di DOW Sr. Marlon Croes a splica cu na 2015 a haci un oferta pa WEB tuma e plantanan di RWZI bao su maneho. Pero WEB e tempo no tabatin e capacidad financiero pa tuma e responsabilidad di e plantanan aki. Asina mes, e Director di DOW a ilustra cu privatisacion di e plantanan di RWZI, basa riba un supervision di parti di DOW ta keda un opcion pa futuro. Pero en todo caso, Croes a bisa cu renobacion di e planta, crucial pa bienestar di Aruba, esta economia, salud y medio ambiente ta bay rekeri tempo y finanzas.

Hefe ‘Beheer Waterschappen’ di DOW Frank Benita, Daryl Lue kende ta gerente di e plantanan y Kirby Barrera, beleidsmedewerker y consehero di DOW tabata presente pa duna splicacion detaya di e retonan.

Benita a bisa cu e planta na Bubali ta data di 1972, y ta traha pa procesa 4200 meter cubico di awa diario. E cantidad cu e planta ta haya awendia ta dos biaha mas hopi, cu riba su mes ta un problema, pero agrega na esaki e hecho cu e planta a keda sin haya e mantencion necesario, ta ilustrativo pa e problema grandi. E otro dos plantanan, esun Parkietenbos y Zeewijk no ta confronta problemanan. “A tuma e planta di WEB na 1992 y e prome renobacion a tuma luga na 1995. E di dos renobacion a sosode na 2007 unda a traha riba e parti primario di e planta unda a concentra riba e recepcion di e volumen di awa y no a proceso mes.”

Na 2009 a puntra Witteveen en Bos pa un conseho riba e slib, of sludge y aki e conseho tabata pa sea gasifica e material of kima. A scoge pa e di dos ya cu e ta menos costoso. Na 2014, Witteveen en Bos a bolbe traha un rapport riba RWZI unda a bisa cu mester di henter un ariacion nobo y a sugeri pa traspasa e plantanan pa WEB. E aña despues a inverti 1 miyon pa mantecion colectivo y TNO Caribbean a haci un analisis comercial cu a mustra cu mester 13 miyon pa otro ariacion. “Na 2018, DOW a pidi 1.8 miyon pa renobacion di e planta, pero a usa e placa pa e incinerador pa kima e sludge di manera mas eficiente y cumpli cu norma medio ambiente.” Na 2019 DOW a manda un rapport pa Gobierno pa indica cu e planta na Bubali y e riolering ta hopi malo y cua ta e impacto pa sector turistico. Asina a ricibi 3.6 miyon pa cumpra ekipo critico, unda entre otro a inverti casi un miyon pa un solucion a termino corto pa e holo stinki.

Mantencion di e plas

Daryl Lue di su banda a splica con ta usa e fondonan aki, y ki ekipo a cumpra pa maneha e situacion. E inversion ta pa purba maneha e situacion, entre otro a cumpra aquajets pa mas oxigeno, aunke cu e ta mita cu locual TNO Caribbean ta conseha. En todo caso a tuma paso pa baha e holo malo y e construccion di e muraya di beton pa e tanki di 50 aña ta andando.

Kirby Barrera di su banda a ilustra cu e saliña na Bubali mester por ricibi 2000 a 2500 cubico meter di awa pa dia, pero e volumen ta awor 5 a 6000 pa dia. P’esey awa ta bay den e bario di San Miguel ora cu e ta hopi y si e nivel di awa ta hopi halto despues di yobida pisa, mester habri e sluis pa lama. Pero Barrera a bisa si cu muestranan cu ta tuma den varios area den e plas, a detecta cu ta na un zona so tabata halto na fecalis. Pero ta e zona cu tin hopi mata, cu ta inclui e hyacintha y e yerbe. Ya caba den colaboracion cu Fundacion Parke Nacional Aruba a cuminza saca e lelinan y ya caba a nota mehoracion y animalnan a cuminza bolbe e area. Mester warda cu e yerbe te ora cu e periodo di migracion di parha termina. Hopi parha ta usa e yerbe pa pone nan neishi.

Segun Frank Benita, DOW ta traha pa Pais Aruba y kier e miho pa e isla. Como tal, kier transforma e planta den un asina yama Waste Resource Recovery Facility, unda por bende awa pa cunukeronan y golf coursenan, mientras cu e sludge a lo largo por produci energia. Den otro palabra cumpli cu e SDGnan y yuda cu un economia circular.

Director di DOW Marlon Croes a bisa cu e problema grandi di e planta na Bubali ta pasobra Gobiernonan a keda atras cu mantencion. “Pa futuro mester sigui haci inversion, incluso den mantencion. Mester bin un cambio den mentalidad pa asina sigura cu ta aloca placa pa mantencion. “Ta bay studia un business plan pa sector priva lo por maneha e RWZI, cu un DOW ta controla, y cu tin e incentivo financiero. Pero nos ta consciente cu ora cu ta cla cu e PPP cu DOW lo mester ‘stoot af’ e plantanan. For di 2014 kier a stoot af caba pa WEB cu no tabatin e capacidad financiero.” Sinembargo, Croes a bisa tambe cu Gobierno ta laga hopi placa drumi, pasobra no ta cobra pa e conexion na riool cu ta hiba awa na Bubali, tampoco ta cobra pa procesamento di e awa. Ademas mester por bende awa procesa, algo cu no ta sosodiendo awor aki.

Locual a bira hopi cla ta cu e rapport di CARMABI a mustra cu no solamente e RWZI ta contribui na degradacion di rifnan di coral, pero cu tin hopi otro factor ta hunga un rol. Sinembargo, Director di DOW ta mustra si cu e calidad di e awa procesa cu ta bay lama no ta esun di miho calidad, pero e midimento cu CARMABI a haci tabata na e fuente unda e awa ta sali.

“Hotelnan tambe ta usa hopi fertilizers cu ta nutriente cu ta afecta rifnan. Nos ta de acuerdo cu como pais Aruba mester minimalisa e riesgonan. E planta ta trahando cu sobre capacidad. Cu e inversionnan awor lo por hisa e calidad actual na 70 porciento di loke mester,” Croes a splica agregando cu esaki lo duna tempo pa yega na e sistema nobo.

16 miyon

Minister Arends di su banda a bisa cu ta danki na sector turistico cu por a aloca 16 miyon pa e prome fase di e renobacion completo. Sinembargo, no ta fondo adicional di ATA, sino ta e placa cu turismo a genera pa Aruba y cu ta bay den e medionan general di Aruba. Locual a dicidi ta cu e medionan aki lo ta destina specificamente pa e planta di Bubali. Te ainda, e unico cu berdad ta bay inverti den procesamento di awa ta Secrets na Seroe Colorado. E planta lo ta basa riba exigencia di DOW y tanto e hotel como casnan den bisindario lo por haci uso di e awa procesa.

E reunion ayera tabata uno informativo y Presidente Vrolijk a bisa cu e ta kere di lo organisa mas di e tipo di reunionnan asina, mirando cu ta duna expertonan e oportunidad pa duna informacion detaya na Parlamentario y comunidad. Dialuna lo tin un reunion publico riba e mesun tema.