Recientemente director di DOW Marlon Croes tabata na Hulanda caminda el a bishita Cas di Aruba. Gobierno di Aruba a dicidi cu Cas di Aruba na Hulanda (Arubahuis) ta haya su atencion pa wordo renoba. Marlon Croes a inspecciona e edificio completo pa mira e condicion pa asina na Aruba nan por sigui cu e preparacionnan necesario.
Esaki ta, for di comienso, e deseo di Minister Plenipotenciario Guillfred Besaril, mirando cu e edificio di Arubahuis tin mas di 100 aña bieu y ta rekeri un renobacion.
Durante su bishita Croes a reuni cu Anthony Giel y Roy Hart. Na e ocasion aki a probecha pa presenta un proyecto di un compania Hulandes cu ta interesa pa traha cas na Aruba. Esaki ta cu un sistema moderno cu ta haci cu den tres luna bo por tin bo cas cla.
Marlon Croes a keda hopi satisfecho cu e por a bishita Cas di Aruba na Hulanda pa asina DOW por tuma un miho decision tocante e renobacionnan cu mester tuma luga.
