Proceduranan cu a wordo tuma contra e 7 duaneronan cu lo a comete un delito ta canando un caminda normal. Esaki ta segun director di Cuerpo di Duana, Ricky Croes.
Esaki, ta apesar cu tin un preocupacion cerca e sindicato y e demas coleganan, kendenan a expresa cu ta un trato inhusto, mirando cu den pasado delitonan a yega di wordo cometi pa hendenan cu posicionnan mas halto y no a wordo persigui.
Riba esaki, Croes a mustra cu grandi y chikito pa Croes ta mesun cos. Croes no tin mucho tempo sinta eynan, pero na su opinion, tur hende ta mesun cos, pasobra si algo a wordo haci cu no ta di acuerdo cu obligacionnan cu gobierno, e ora tin cu tuma paso.
Procedura
Pa loke ta e procedura, tin cu haya un rapport di loke a sosode, ta haci obhecion y tin cu wak ki straf lo bay haya.E procedura normal ta cu algo a bay asina ey pa asina evita cu nan ta bin trabao pa por tin contacto cu otronan y mientras tanto e procedura ta canando. Croes a sigui bisa cu tur cos ta depende e gravedad di e delito, pasobra cualkier procedura disciplinario tin diferente straf cu por wordo poni riba dje. E por bay di boet, pa aviso verbal, por escrito y hasta retiro. Tur eseynan ta posibel. E empleadonan mes a wordo entrevista y a duna nan banda di medaya. Awo, e declaracionnan aki lo bay wordo poni por escrito den un rapport, pa despues sigui cu e proceso. Esaki ta un procedura normal, Croes ta reitera.
E schorsmento tin su tempo. Ta laga esey cana via DRH. Nan ta e expertonan riba e tereno aki y nan lo sigui wak pa e rapport yega na e autoridad competente y e ora nan lo duna nan punto di bista.
Sin prueba no por haci nada. E simpel hecho cu un paso a wordo tuma, ta pasobra u tabata tin algo cu a tuma luga.
Derecho
E trahadonan tin derecho di cana. Den LMA tin derecho y obligacion y den e caso aki ta bay wak e debernan di nan. Naturalmente SADA ta wak pa nan derechonan y eynan ta wak na final si yega asina leu, un hues lo bisa cua tin rason.
Esaki por yega te na retiro, dependiendo gravedad di e asunto. Seis trahado ta suspendi te awor aki. No tabata tin un prueba cu ta indica cu si lo tabata tin algo,cu lo mester a keda geschors tambe. E lo por bin trabao normal.
Awor aki strafnan disciplinario no ta aplicabel. Manera cu procedura caba, e ora lo wak kico lo pasa. E trahadonan lo cobra normal te ora cu si yega asina leu, wordo retira.
Motor pa haya placa
Duana ta un departamento importante. E ta un di e organonan di gobierno cu ta trece placa aden, fuera di Departamento di Impuesto. Croes a indica cu tin cu traha cu e hendenan integro y ta purba di tene asina. E no ta bisa cu e hendenan aki no ta integro, pero mester yega na un caminda cu tur ta traha segun leynan.Tin cu por bira mas grave cu e otro, pero te awor aki mester wak con leu ta bay.
Metodonan disciplinario
Si tin cualkier cos cu a pasa afo, por entrega un keho penal. Locual cu ta bay haci ta disciplinario pa empleadonan di duana, ora tin un caso den cualkier otro departamento. Awor aki loke ta eyfo, si tin caso andando, polis of ministerio publico ta haci esaki.
E parti di comerciante of esun cu a comete un delito, Cuerpo por entrega un keho y recherche ta percura pa esey. Den e parti di duana cu por haci algo of a contribui, esey ta e parti disciplinario cu ta bin na vigor.
Cuerpo a prueba tur loke tabata fout y con ta ataca esey, pero pa loke ta trata e 7 trahadonan, a haci un ahustacion pa cubri tur e bashinan cu por existi.
