Director di CEDE Aruba, Sr. Daniel Tecklenborg: Cantidad di famia den necesidad lo sigui aumenta… mester ta prepara p’e

E siman aki CEDE Aruba tabatin programa un reunion cu Gobierno riba e maneho y logistica di e ayudo humanitario pa e famianan den mas necesidad debi na e pandemia di Covid-19.

Director di CEDE Aruba, Sr. Daniel Tecklenborg a enfatisa cu aunke nos kier ta positivo, por ehempel Aruba a cuminsa cu su plan di vacunacion, y tambe hopi cos ta wordo haci pa reactiva nos economia. Pero Sr. Tecklenborg kier ta realistico tambe cu nan ta kere cu e pronostico economico ta bay slow. Kiermen turismo lo yega bek na su nivel, pero poco poco. Pues nan ta analisa cu na 2021 te hasta na aña 2022, pais Aruba lo confronta mas reto ainda. Nan ta premira hopi persona lo perde trabao ainda.

CEDE Aruba su intencion ta pa enfatisa hopi fuerte riba e situacion di tanto famia den necesidad cu lo sigui subi, y nos mester ta prepara pe. E tin cu bisa cu na e momento aki Gobierno di Aruba ta trahando riba e plan strategico riba e parti di asistencia di alimentacion cu lo wordo anuncia pronto.

E rol di e fundacion aki no ta ainda completamente concreto. Na e momento aki e plan strategico ta cay bao responsabilidad di departamento di Asunto Social y Bureau Rampenbestrijding. E plan ta den desaroyo y pa e motibo ey, e rol di e diferente organisacion no ta defini ainda. Pero intencion tabata pa e plan bin cla e fin di luna aki. “Unda cu nos por, nos ta dispuesto pa contribui,” Sr. Tecklenborg a bisa.

Situacion

E situacion actual ta demanda cu mester bin cu un sistema mas structura pa sigui brinda e ayudo humanitario aki.

Sr. Tecklenborg a declara cu nan iniciativa Happy To Give Back ta e manera con ‘pueblo por yuda pueblo.’ Pero logicamente e no ta e solucion structural cu nos mester pa e sigui atende cu e situacion aki. Kiermen Aruba mester di un plan structural pa sigui atende cu e problema socioeconomico cu Covid a ocasiona den nos comunidad.

Ultimo tempo pais Aruba a ricibi e ayudo humanitario grandi cu gobierno di Hulanda a duna, y lo sigui duna te 1 di juli awor. Pero tambe tabatin contribucion di gobierno di Aruba, igualmente di fondonan Hulandes y internacional. Hopi compania tambe a duna su contribucion valioso pa mengua e necesidad di cantidad di famia na Aruba. Pero sin duda mester bin cu un plan strategico pa por crea e conexion entre e situacion actual te ora cu economia di nos pais ta fuerte bek.

Segun Sr. Tecklenborg, nos mester ta prepara pa un scenario unda durante 2021 y eventualmente 2022 lo bay tin un subida di hopi famia cu problema. Na e momento aki – segun e tin conocemento di dje – 12 mil hogar a inscribi tanto na Cruz Cora y Fundacion Pa Nos Comunidad. E ta un demanda grandi di ayudo caba. Pero teniendo na cuenta calculacion di CBS riba pronostico pa perdida di trabao, e por yega na 15 mil hogar. E panorama aki ta un señal cu nos tin cu ta prepara pe.

Contribucion

E panorama aki ta haci e urgencia mas necesario pa comunidad por contribui durante e celebracion virtual di Aruba Dag 2021. Esaki no kiermen cu mester benta tur responsabilidad pa pueblo. Pero e ta kere cu Aruba Dag 2021 ta un bunita momento pa tur hende cu tin un curason pa Aruba, ya sea cu nan ta na Aruba of pafo, pa nan por haci un contribucion ainda. No solo pa gosa y celebra e dia ey, pero duna bo contribucion.

CEDE Aruba ta hopi consciente cu e iniciativa di organisa un Aruba Dag 2021 virtual hunto cu Arubahuis, ta e momento oportuno cu nan ta bay clausura e proyecto di Happy To Give Back. Nan lo traha activamente den cualkier otro plan cu lo wordo traha hunto cu gobierno. Si despues e fundacion aki ta bin cu otro iniciativa pa pueblo por sigui contribui, nan lo anunci’e oportunamente.

“Mester ta consciente si cu e problema ta subi y bo no por keda pidi tanto di comunidad,” segun Sr. Tecklenborg. Pues e celebracion virtual di Aruba Dag dia 28 di maart lo bira un oportunidad mas pa tur hende cu por duna un man uzando e plataforma di CEDE Aruba:www.happytogiveback.com

Sr. Tecklenborg a declara na Bon Dia Aruba cu den cuadro di Aruba Dag 2021 virtual destina pa recauda fondo via CEDE Aruba no tin un cifra estableci. “Nos no tin un cifra. Nos meta di Happy To Give Back ta pa yega na e suma final di 1 miyon dollar,” el a bisa. No mester lubida cu e fondo aki ta a base di contribucion di comunidad pa comunidad.

Como fundacion nan mester ta ambicioso den e bon sinti di palabra pa sigui yuda otronan den necesidad. P’esey den e dia ey nan no kier pone un suma specifico como meta, pasobra nan sa cu hopi hende no tin e situacion economico facil. “Nos no kier pone un meta mucho halto,” segun director di CEDE Aruba.

El a haci un apelacion pa mas hopi hende posibel por contribui cu un suma chikito, kiermen cu locual nan por. Cualkier donacion cu nan por ricibi ‘nos ta celebra,” Sr. Tecklenborg a declara.