Director di CEDE Aruba, Daniel Tecklenborg a declara cu desde inicio di e crisis y cu Aruba a cera su frontera, e necesidad naturalmente a cuminsa crece masha hopi mes.

Pa brinda e ayudo necesario, CEDE Aruba ta depende di e contribucion di e gobierno di Hulanda. Tambe nan ta depende di e contribucion di gobierno di Aruba y grandemente di e contribucion di comunidad di Aruba y diferente fondo di afo cu tambe CEDE Aruba ta purba di acerca aworaki.

Sinembargo tur cos ta depende kico lo bay sosode den e siguiente lunanan entre e eventual acuerdo entre Aruba y Hulanda. “Tur cos tin efecto,” el a bisa. Di nan banda – segun Tecklenborg – nan ta keda sigui pusha pa yuda mas hende posibel.

Encuanto si e ayudo cu CEDE Aruba ta bin ricibiendo for di Hulanda ta condiciona riba acuerdo cu por ta Aruba ta bay firma cu nan. Tecklenborg a declara cu absolutamente no. El a laga sa cu e ta dos cos diferente. E ayudo humanitario cu gobierno di Hulanda ta duna na e momento aki, no ta mara na otro condicionnan cu tin di haber riba nivel politico, el a bisa.

Na e momento aki, Tecklenborg a declara cu e fondo di Hulanda ta e suma mas grandi. E ta corda cu pa e periodo di juni te cu september e tabata ta alrededor di 10 miyon florin. Di cual FPNC por a usa un suma di alrededor di 2.3 miyon. Mientras cu e mayoria di e fondo ta bay den e proyecto di voucher di Cruz Cora.

E sistema di voucher ta duna bo e posibilidad di haci compra den cierto supermercadonan. Pero na e mesun momento e sistema di cumpra producto for di FPNC, bo por haya e producto na un miho prijs, el a bisa. Di e forma aki, indirectamente bo por yuda mas famia cu e fondo aki door cu bo ta cumpra e productonan mas barata. Sinembargo e ta demanda mas logistica, ya cu e ta mas trabao pa por traha e pakete pa distribui nan.

El a laga sa cu for di 18 di september e ayudo humanitario di gobierno di Hulanda ta bay solamente via Cruz Cora. Nan tin intencion pa aumenta e programa di voucher. Prome cu 18 di september, CEDE Aruba tabata parti di un acuerdo, pero actualmente nan no ta mas. Aworaki CEDE Aruba ta usando solamente e fondonan cu nan tin di Happy to Give Back, y tambe di gobierno di Aruba. Tambe tin fondo di CARITAS cu ta bay directamente hunto cu FPNC unda nan ta cumpra e pakete di cuminda.

Riba nan mesun forsa CEDE Aruba ta purba di yuda mas hende posibel. Sinembargo nan mester wak con e ayudo aki ta bay desde januari. E intencion aworaki ta esun di sigui cumpli cu e ayudo aki te cu fin di december pa medio di e fondo di Happy to Give Back, y tambe e fondo cu nan tin di gobierno di Aruba.

Mas necesidad pa ayudo

Na luna di april tabatin por ehempel na Fundacion Pa Nos Comunidad (FPNC) mas cu mil cu a wordo yuda caba. Na luna di mei e ayudo aki a bira pa 3 mil y despues el a sigui subi te cu 4 mil. Durante augustus e cifra a keda entre 4 mil pa 5 mil famia cu a haya e tipo di asistencia aki.

Pero di otro banda, Cruz Cora tambe a aumenta e cantidad di nan programa di voucher. Nan ta casi 5 mil famia cu ta wordo yuda voucher y e suma aki aparentemente ta bay sigui crece tambe, segun Tecklenborg. Pues e necesidad den nos comunidad ta sigui crece keto bay.

Hunto cu e mesun cantidad di hende cu ta wordo yuda, e cantidad di peticion tambe ta keda subi, el a declara. Aworaki nan tin alrededor di un total di 12 mil famia cu a aplica pa ambos organisacion, esta Fundacion Pa Nos Comunidad y Cruz Cora.

“Esaki ta un cantidad di hende cu ta dificil pa yuda tur,” el a declara na Bon Dia Aruba.