No tin niun caso registra ni sospechoso di Novel Coronavirus (2019-nCoV), na Aruba. E ta e virus nobo descubri den e localidad di Wuhan na China, caminda cantidad di caso a keda descubri y tambe el a cuminsa produci morto y plama den otro paisnan.
Ayera durante un conferencia di prensa extraordinario, director di Bureau Rampenbestrijding Aruba (BRA), Rino Hermans a bin trece mas informacion y trankilidad pa evita un ambiente di panico den nos comunidad. “Aruba ta prepara,” el a bisa.
Hermans tabata realistico di bisa cu no ta asunto di preveni pa evita cu e virus por drenta Aruba, pero si con nos por deal cune, si nos ta haya un caso na Aruba.
El a bisa cu nos tin un plan general pa atende cu malesa contagioso cu por drenta via nos porta di entrada cu ta waf y aeropuerto. E ta un plan cu ta data di 2014 y cu nan a yega di activa tres biaha caba. Aunke nos no ta den un crisis na Aruba, pero for di siman pasa BRA a adapta e plan aki pa atende cu e situacion actua.
Sinembargo nan ta wardando e resolucion di Organisacion Mundial di Salud (WHO) pa adapta e plan specificamente pa atende cu e Coronavirus na Aruba. Igualmente instancia como Triple A (Aeropuerto) y APA (waf) tambe ta adapta nan plan interno.
“Cu otro palabra, nos kier notifica e pueblo cu nos ta prepara. Cu nos ta proactivo ariba e virus aki,” asina Hermans a bisa.
