Director di Banco Central di Aruba, Jane Semeleer, a expresa su preocupacion tocante e decision di gobierno di Aruba pa paga un interes halto na Hulanda. El a laga esaki cla durante su discurso na InterExpo 2023, argumentando cu e fondonan aki lo tabata miho inverti den comunidad di Aruba.
Esaki a keda reporta den e noticiero online, bnn.network.
Segun e relato di bnn.network, Semeleer a enfatisa e debe cu interes halto cu awo Aruba ta confronta pa motibo di prestamonan di Covid-19. El a destaca e importancia di mantene un relacion faborable cu Hulanda, mirando e inhabilidad di Aruba pa haya acceso na facilidadnan multilateral internacional manera Fondo Monetario Internacional (IMF) of Union Europeo pa motibo di su posicion dentro di Reino Hulandes. Ademas, Semeleer a nota cu e negociacionnan recien cu Hulanda no ta particularmente bentahoso.
Aruba ta comprometi na paga un suma anual, incluyendo interes, cu ta 30 miyon florin mas cu necesario, segun Semeleer. A pesar di proyeccionnan di crecemento positivo pa sector financiero den añanan binidero, e peso di interes halto aki lo por pone otro necesidadnan urgente den peliger. Semeleer a sugeri cu lo por usa e fondonan mas efectivamente pa e bienestar di comunidad Arubano.
Semeleer ta optimista cu e base economico robusto di Aruba por cubri gastonan fiscal y eventualmente elimina debe. Mientras ta cumpli cu regulacionnan fiscal manera RAft y LAft, gobierno di Aruba ainda mester refina ley di impuesto y mehora colecta y cumplimento cu impuesto.
Bon Dia Aruba a tuma contacto cu oficina di Semeleer pidiendo pa comentario y clarificacion riba e comentarionan di Semeleer, pero no a ricibi contesta inmediato.
