ORANJESTAD – Te ainda, AZV no tin un bista preliminar di nan gasto den e prome kwartaal di 2019 compara cu aña pasa. Sinembargo, nan ta purba di baha e gastonan, sin cu esaki por afecta e calidad di e cuido di nan proveedor di servicio di salud.

Director di AZV, Ruben Goedhoop, a indica cu nan ta cumpra cuido, mientras cu por ehempel hospital tin e responsabilidad di duna cuido di calidad halto y accesibel pa nan clientenan. “Pero tambe e gastonan mester ta aceptabel,” el a bisa. Den esaki, e ta haya cu AZV por vigila, monitor y te hasta unda ta posibel, determina y influencia, e dunamento di cuido localmente y hasta den exterior.

Encuanto e gastonan, Goedhoop, a declara cu ora nan ta compara nan cifra internacionalmente. Aruba su gasto di cuido di salud ta abou. Aunke e cifra di nos gasto den su totalidad ta grandi, pero ora cu e cifra aki ta wordo compara relativamente den porcentahe, nos ta mas abou cu Europa y cu Merca, el a bisa. E ta aclaria cu a pesar di esaki, nan no ta contento, ya cu nan kier baha mas nan gastonan. E gastonan mester ta aceptabel y nan mester tin semper fondo p’e.

“Si nos ta contento cu e cifra? Claro!, nos kier e cifra mas abou,” el a expresa. Pero AZV kier baha nan gastonan di cuido te hasta unda e ta posibel. Aunke nan ta consciente cu e gastonan lo por aumenta, ya cu e añanan cu ta bin mas hendenan ta bira grandi, locual lo exigi mas cuido, loke ta nifica mas gasto.

Ademas hospital nobo ta bin, mientras mas hende ta exigi mas cuido, mas calidad y mas servicio. Tambe nos cuido di nos hende grandi ta wordo evalua si e lo cay bou e capa di AZV, y nan ta mas gasto. “Pero e problema ta semper, tur hende kier mas cuido, mas calidad, mas servicio, pero niun hende kier paga,” el a declara. Y semper como seguro medico general nan tin cu mira e balans ey. Nan ta evalua tur esaki, pasobra ta dificil pa AZV por baha gasto den su totalidad. Pero nan ta purba di bah’e unda nan por. Nan ta negosha cu e dunadonan di cuido di un forma ‘duro pero husto’, el a bisa.

Aruba Health Fair
Goedhoop ta haya cu prevencion ta un di e topiconan cu mester tuma luga pa baha gastonan den futuro. Un evento cu lo yuda duna mas informacion rond di e topico aki tin di haber cu Aruba Health Fair, cu lo tuma luga dia 8 di juni den e mesun localidad di AZV. Asina e hendenan por ta mas consciente riba nan mes responsabilidad di salud. Pero tambe pa AZV por splica mas specificamente riba nan responsabilidad.

Director di AZV ta haya cu awor e parti di prevencion ta demanda hopi placa den inversion. P’esey e prome actividad di e caliber aki, AZV ta organisa cu ayudo di diferente partner y sponsor. E campaña di prevencion aki ta uno positivo, pero nan no sa ki momento e beneficionan lo bin bek den bahamento di gasto y con hopi e lo ta pa AZV.

Pero e ta haya cu e parti di prevencion mester ta un responsabilidad comparti, y no cu AZV mester zorg su so pa traha riba e tereno aki. Sino cu gobierno y un gran cantidad di fundacion tin un responsabilidad pa e conscientisacion y prevencion di salud por tuma luga. E ta reconoce cu tin cantidad di fundacion cu ta traha riba tereno di prevencion den forma diario.

Sinembargo, e ta mira cu cada un ta haci’e ariba su mes, en bes di haci’e di un forma mas integral. AZV a yega di bin cu e idea di bin cu un plan nacional di prevencion, y actualmente departamento di salud Publico (DVZ) hunto cu PAHO ta bezig actualmente cu un plan asina. AZV ta join nan pa e plan aki por bira uno colectivo y cu por duna resultado.