E siman aki Bon Dia Aruba a publica un storia di un hoben cu problemanan mental, kende tin nan famia traumatisa y preocupa. Nan tambe mescos cu varios caso similar, ta bisa di a bay tur caminda pa ayudo, cu tur instancia sa di e caso, pero nada nunca a wordo haci.

“Tin ayudo pa cuido mental , pero e ta limita”,  director di AZV Anco Ringeling ta splica. Esaki ta su contesta ora nos a puntr’e kico un famia manera esaki por haci pa por haya un solucion pa nan familiar. Specialmente despues di a cana un caminda di cruz pa ayudo sin resultado ainda.  E director ta bisa nos cu e cuido cu por wordo brinda aworaki aparentemente no ta suficiente adecua. “Hopi bes bo ta mira cu famia di un persona cu tin mester di e cuido aki ta haci hopi esfuerso te asina leu cu nan por. E por ta un presion basta grandi pa un famia si pa un periodo basta largo bo mester yuda un persona asina.” E ta agrega cu no ta asina cu no tin ayudo profesional mes, pero e no ta semper adecuado.
Anto ta den esaki, segun e director, ta unda e fundacion nobo cu lo encarga cu e cuido aki kier trece mehoracion.

PAAZ
E director ta na altura cu PAAZ en berdad ta un instancia cu un pashent no por keda pa un duracion largo.  PAAZ ta pa hendenan cu tin mester di tratamento chikito, mientras cu tin pashent cu mester di duracion largo. Hopi bes segun sr. Ringeling, tin pashent cu e parti mas importante di nan tratamento ta pa nan haya nan remedi, anto na tempo. “Tin pashent cu ta den un situacion cu esey riba su mes caba ta un desafio. Si no tin e regularidad cu ta exigi pa bo por tuma bo medicina na tempo. Por ehempel e enfermeronan di SPD (Sociaal Psychiatrische Dienst) mes ta bay cerca e pashent, nan ta traha hopi outreached . Mirando situacion di algun pashent, no ta e pashent di mas facil pa anda cu nan. P’esey trabao di SPD ta hopi di aprecia pasobra nan tin cu haci hopi esfuerso pa por acerca e pashent pa por tuma nan medicinanan y asina toch por keda controla.”

Caminda pa drecha
Pues e director ta enfatisa cu no ta asina cu no tin caminda pa bay, pero cu seguramente tin caminda pa drecha tambe y mehora e cuido aki. Esaki netamente ta e meta di e fundacion nobo Stichting Geestelijk Gezondheidszorg (SGG). “E fundacion ta lantando aworaki. Pues den e proceso ey nan ta den un fase pa busca un edificio, personal mester bay over di PAAZ, SPD, etc. Pues e fundacion na e momentonan aki no por duna e ayudo. ” E director ta enfatisa cu locual ta keda na momento aki ta PAAZ y psikiatranan. E ta bisa cu un persona por bay cerca su dokter di cas y pidi un verwijzing na un di e psikiatranan. E psikiatra lo evalua si e pashent lo tin mester di cuido pafo di PAAZ of temporalmente keda interna den PAAZ.

Fundacion famia Ling
Manera cu nos a trece pa dilanti caba den publicacionnan anterior, minister di Salud ta bisa cu no lo kita derecho y lo trece tur trahado di SPD di gobierno y PAAZ na mesun nivel riba e concepto di e funcion di e fundacion, tur bao di SGG.

E fundacion aki lo duna e claridad riba ki direccion e lo bay cual e mandatario ta premira cu cosnan lo ta canando pa fin di e aña aki/comienso di otro aña.
Actualmente Bon Dia Aruba ta pendiente pa combersa cu e fundacion aki pa sa un poco mas di nan y kico nan plan ta pa enfrenta e problemanan aki riba nos isla. Como tambe seguramente si tin algun yudansa/guianan cu nan por brinda for di awor caba na famianan cu tin basta tempo ta buscando solucion, te casi no por mas.

Bon Dia Aruba tambe kier remarca cu den PAAZ tin un grupo di pashent cu si tin decada interna de e instituto. Sinembargo ta purbando pa varios aña pa e pashentnan aki, cu tin edad grandi caba, pasa over pa SABA. Sinembargo den SABA no por garantisa e mesun tratamento cu nan tin awor den PAAZ.