Cu mas turista ta haya test positivo, ta nifica cu mester mas espacio den luganan alternativo y Aruba Tourism Authority ta buscando mas cas pa acomoda e bishitantenan infecta y nan famia. Asina Director di ATA, Ronella Croes a bisa Bon Dia Aruba.
Manera ta conoci, prome cu dianan di fiesta, ATA a haci un apelacion na tur esnan cu tin acomodacion (apartamento por ehempel) disponible ainda pa e proximo simannan y cu ta dispuesto pa huur, pa tuma contacto cu ATA na 5664961.
Fuentenan yega na redaccion di Bon Dia Aruba a mustra cu falta di suficiente espacio for di e area di hotelnan a pone cu algun turista cu a test positivo mester keda na nan mesun hotel y cu e hotelnan mester percura pa e control cu e persona(nan), no sali di nan camber. Pero, e ta un tarea hopi dificil.
Sinembargo, ayera Director di ATA, sra. Croes a bisa Bon Dia Aruba cu ta sigui cu e protocol cu a implementa desde reapertura di frontera. “Esta, cu ta acomoda casonan positivo na acomodacionnan alternativo,” Sra. Croes a enfatisa. “E huespednan na hotel mester warda pa nan por keda re-aloca y nan mester warda den nan camber te ora cu esey por tuma luga.” E Director di ATA a enfatisa cu hotelnan ta sigui protocolnan debido den caso asina.
Pa loke ta e control riba personanan infecta, DVG ta responsabel pa haci e control den tur caso di isolacion. “Esnan di Aruba cu a haya COVID-19 sa con esaki ta tuma lugar,” Ronella Tjin Asjoe a mustra.
Mientrastanto, ta sigui busca mas cas of apartamento pa acomoda personanan no-residente cu ta test positivo pa COVID-19. E rekisitonan ta cu e apartamento mester tin su mesun entrada y salida, e mester ta den bon estado, mester tin ventilacion apropia, preferiblemente mester tin cushina basico y WiFi. E seguro obligatorio cu tur turista ta cumpra lo cubri e gasto di huur. ATA ta sigura cu ta hiba e protocol na forma profesional y discreto.
Potret di archivo.
